A Aarõ na n ninga sãnem fitil kãsenga sɛka roogẽ, peenda sẽn lill kuga walsa koglga taoore. Fitila na n wida m taoor zaabr n ta yibeoogo. La rẽ yaa noor sẽn kõn teem abada f yagensa yĩnga.
Daar a ye zabr n zĩnd sika pʋga. Yaa Israyɛl biig menga n zab ne Ezipt tẽng rao biiga. Ezipt tẽng neda rog-a-la ne Israyɛl bi-pugla sẽn boond tɩ Selomit. A Selomit ba la a Dibri, Dã sakẽ neda.
«Kɩt tɩ b yiis sẽn sãama Soaala-Wẽnd yʋʋrã we-kɛɛnga. Yeel neb niyns fãa sẽn wʋm a gomdã tɩ b rɩk b nus n tik a zugu la rẽ poor bɩ Israyɛl kamba fãa laba ne kuga.
Ned ninga sẽn sãama Wẽnnaam yʋʋre, toga ne kũum la yaa Israyɛl zãma wã n na n laba ne kuga. Sẽn tʋʋs-a Soaala-Wẽnde, a yaa tẽnga biig bɩ sãana, b kʋʋd-a lame.
A Moyiiz deng n wilga Israyɛl kamba woto, dẽ poore, b yiisa we-kɛɛnga sẽn da sãama Soaala-Wẽnd yʋʋrã n lab-a ne kuga. La woto b maana wala Soaala-Wẽnd sẽn da wilg a Moyiiz.