“Kabala kantha reya ka bangsa Isra'il: Mon ba'na la maso' ka nagara se bi' PANGERAN eparengngagi ka ba'na rowa, ba'na kodu ngormat PANGERAN kalaban cara se kantha reya: Sabban taon se kapeng petto' ba'na ta' olle agarap tana.
Tape sabban taon se kapeng petto' kodu atorragi ka PANGERAN malolo. Daddi saabidda sataon jareya tanana ta' olle egarap. Gal-teggal ta' olle etamenne ban ka-bungkana anggurra ta' olle totto.
La'-mala' gandum se tombu dibi' otabana anggur e bungkana se ta' etotto, ta' olle polong otaba esempen sabab taon jareya taon istirahat monggu ka tana.
Sanajjan e taon jareya tanana ba'na ta' egarap, tana jareya bakal madhatengnga hasel keya se daddiya kakanna ba'na, nor-dunorra, la-kabulana, ban reng-oreng manca se apolong ban ba'na.
Taon se kapeng saeket jareya kodu socceyagi. E taon jareya ba'na kodu ngomommagi kabebasan ka reng-oreng sanagarana. E taon jareya sabarang dhi'-andhi'na oreng se la ejuwal kodu epabali ka se andhi' dha'-adha' otaba ka na' potona. Pa'-sapa'a se ejuwal epadaddi dunor kodu epabali ka balana.
Argana tana jareya kodu eteptebbagi menorot bannya'na taon saabidda tana jareya bisa madhateng hasel sampe' ka taon e baktona tana jareya kodu epabali pole.
Ban e bakto ba'na namenne teggalla e taon se kapeng ballu', hasella tana e taon se kapeng ennem gi' badha se ekennenga kakan ba'na. La'-mala' parsadhiya'anna kakanna ba'na gi' bakal cokoba sampe' napa' baktona ba'na makompola hasella tanana e taon jareya.”
oreng se andhi' tana jareya kodu majar ka oreng se melle tanana saargana hasella tanana e dhalem on-taon se bakal dhatengnga sampe' ka Taon Pabaliyan se bakal dhateng. Kalaban cara se kantha jareya oreng buru narema balina tanana.
Tape mon oreng jareya ta' kellar nebbus tanana, oreng se melle teptep kobasa ka tana jareya sampe' Taon Pabaliyan se bakal dhatengnga. E dhalem taon jareya tana jareya kodu epabali ka orengnga se andhi'.
Tape mon bengko jareya ta' etebbus e dhalem bakto sataon, ha'na kaangguy nebbus bengko jareya elang. Bengko jareya teptep daddi andhi'na oreng se melle ban na' potona. E dhalem Taon Pabaliyan, bengko jareya ta' osa epabali.
Kaangguy bengko e disa se ta' epagari bato sakalenglengnga atoranna padha ban atoranna tana: se andhi' bengko dha'-adha' andhi' ha' nebbus, ban bengko jareya kodu epabali e dhalem Taon Pabaliyan.
Mon oreng Lewi ajuwal bengkona e sala settong dhari kottha jareya ban ta' etebbus, bengko jareya kodu epabali ka aba'na e dhalem Taon Pabaliyan. Sabab bengkona oreng Lewi e tha-kotthana jareya teptep ha'na reng-oreng Lewi jareya e antarana bangsa Isra'il.
“Mon oreng sabangsana ba'na se apolong sanagara badha se daddi mesken ban ta' andhi' se ekakana ban se eangguya, ba'na kodu nyokong oreng jareya pakantha se nyokong oreng manca sopaja oreng jareya bisa'a terros odhi' e ma'-semma'na ba'na.
Ja' menta budhu' dhari pa-apa se epaenjam ba'na ka oreng jareya, tape ba'na kodu patako' ka Allahna, ban dina reng-oreng jareya odhi' apolong ban ba'na. Bariya keya ba'na ja' ngala' ontong dhari kakanan se ejuwal ba'na ka oreng jareya.
Dunor jareya kodu arembak ban oreng se melle aba'na, se kadhuwa kodu ngetong barampa taon abidda eetong molae dhari bakto oreng jareya ejuwal epadaddi dunor sampe' ka Taon Pabaliyan se bakal dhateng, argana tebbusanna pas eteptebbagi. Argana tebbusanna kodu eteptebbagi noro' etonganna gaji se ebajarragi ka oreng se daddi kabula.
Mon oreng jareya ta' ekenneng tebbus bi' sala settongnga cara jareya, oreng jareya ban na'-ana'na kodu epabebas e dhalem Taon Pabaliyan samarena jareya.
Oreng Isra'il ta' olle epadaddi dunor saomorra sabab bangsa Isra'il reya dunorra PANGERAN, se abakta bangsa Isra'il kalowar dhari Messer. Sengko' reya PANGERAN, Allahna ba'na.”