×

Ika Bible 2018

Lẹvitikọsụ 6

1
Osolobuẹ sị Mozizi:
2
“Omẹni ịhịan mẹ Osolobuẹ njọ ghahanị ịtụ ibe ẹ ntụ banyeni ihiẹn wẹ ye ẹ dọnmẹ mọbụ ihiẹn wẹ gi biye ụgwọ mọbụ gbama ibe mọbụ zunarịn ibe ẹ ihiẹn mọbụ mẹgbu ibe ẹ,
3
mọbụ hụn ihiẹn tuhuni sị ọ hụnn'a mọbụ kun ẹfan Osolobuẹ kanị ntụ k'ọ rị a tụ mọbụ mẹ njọ ndị ọzọ nọ ẹnịna hụn ịhịan e mẹ,
4
ikpe a magụọ a; o k'e wekinhẹnrịrị ihiẹn o zu mọbụ tụnarịn ịhịan mọbụ ihiẹn hụ wẹ ye ẹ dọnmẹ mọbụ ihiẹn hụn tuhuni ọ hụn,
5
mọbụ ihiẹn ọwụlẹ o kunni ẹfan Osolobuẹ kanị ntụ k'ọ rị a tụ. O k'a kụchanrịnrịrị ụgwọ a, wezi ụzọ ohu imẹ ụzọ isẹn chen'ẹ; o we wẹ ile ye onyẹ nwọnn'ẹ, makẹni ikpe a magụọ a.
6
“O sikọ d'e wẹhẹni Osolobuẹ atụnrụn ẹhụ a zu oke mọbụ ọnụ-egho ẹ, we ẹ ye onyẹ nchụn-ẹjan, makẹni ikpe ma a.
7
Onyẹ nchụn-ẹjan a nọ ihun Osolobuẹ gi ẹ chụnn'a ẹjan, o gi ẹ gbarị isi ẹ, a gbagharị w'a ihiẹn ọwụlẹ o mẹ ikpe gi ma a.”
8
Osolobuẹ nọ sị Mozizi,
9
“Ye Ẹrọnụ lẹ ụmụ a iwuni: Lee ni iwu ẹjan w'a dụn ọkụn: Ẹjan wẹ dụn ọkụn k'a rịrị elu ukpo nchụn-ẹjan eki e we fọn; ọkụn sikọ d'a rịsọnmẹ ukpo nchụn-ẹjan.
10
Ụtụntụn, onyẹ nchụn-ẹjan e yiri ẹwuru linẹni ẹ hụ tueru alị lẹ apa linẹ tueru ọgbọdọgbọ hụn o yiye alị-ukun, o kpọnpụ ntụn ahụn mẹ ụtọrọ-ụtọrọ rị elu ukpo nchụn-ẹjan, ntụn ẹjan wẹ dụn ọkụn, kpọn ẹ tọ ụsụọ ukpo nchụn-ẹjan ahụn.
11
Ọ gbụpụ ẹkwa ndị hụ o yi, o yiri ndị ọzọ, bu ntụn hụ gha ebe ịhịan bi pụ, d'e kpọntọ ebe rị ọchan.
12
Ọkụn sikọ d'a rịsọnmẹ ukpo nchụn-ẹjan; etinyụnkọ w'a. Ụtụntụn ọwụlẹ, onyẹ nchụn-ẹjan e we nkụn chen'ẹ, o dọnye ẹjan w'a dụn ọkụn elu ọkụn hụ, ọ nọ elu ẹ dụn ụtọrọ ẹjan ọrịrịmma ọkụn.
13
Ọkụn ya rịsọnmẹ elu ukpo nchụn-ẹjan, etinyụnkọ w'a.
14
“Lee ni iwu oyiye-ọka: o ru, ụmụ Ẹrọnụ ikẹnnyẹ e wẹhẹ ọka ahụn wẹ gi chụn ẹjan ihun Osolobuẹ, ihun ukpo nchụn-ẹjan.
15
Onyẹ nchụn-ẹjan k'a gha ọka hụ wẹ gweriẹn lẹ ofigbọn-olivu sọnn'ẹ kpọnrin ọb'ẹka ohu, o wezi nsẹnsi ile wẹ buche elu ẹjan-ọka hụ chen'ẹ, o gi wẹ nọkin ẹnya oyiye hụ ile, nọ elu ukpo nchụn-ẹjan dụn wẹ ọkụn, o họnrin ẹnwụnrụn, wụrụ ishin a sụọ Osolobuẹ ụsụọ.
16
Ẹrọnụ lẹ ụmụ a e ri hụn họdụnị, kanị, wẹ k'a nọrịrị ebe rị nsọ ri ẹ; ebuchekọ w'a yisti. Ezi Ọdụ-ozuzu kẹ w'a nọ ri ẹ.
17
W'e gikwọlẹ yisti shi ẹ. E wegụọ m'a ye wẹ, ịya ru wẹ ẹka imẹ oyiye ndị wẹ gi ọkụn ye m. Ẹjan rị okẹn nsọ rọ, nọ kẹ ẹjan-njọ lẹ ẹjan onyẹ ikpe ma.
18
Okẹnnyẹ ọwụlẹ wụ onyẹ ebozo Ẹrọnụ nwọn ikẹn ri ẹ. O k'e rusọnmẹ wẹ ẹka agbọ ile lalanị imẹ oyiye ile wẹ gi ọkụn e ye Osolobuẹ. Ihiẹn ọwụlẹ mẹtụn'a k'e họnrin ihiẹn w'a sọ wẹ k'e gbu.”
19
Osolobuẹ nọzị sị Mozizi,
20
“Lee oyiye Ẹrọnụ lẹ ụmụ a sikọ d'e wẹhẹni Osolobuẹ ụhụọhịn wẹ k'e tumẹ wẹ: ọka wẹ gweriẹn hụn k'e ru mkpu kọstadị-nta ẹbụọ; ịya k'a wụ oyiye-ọka w'e yesọnmẹ ogẹn ile: ụtụntụn, o wẹhẹ nkirishi ẹ, ẹnyasị, o wẹhẹzi nkirishi ẹ.
21
Wẹ buche ẹ ofigbọn-olivu, gwọgụ a ọhụnma, gi ihiẹn mẹ pata ghe ẹ, a kpakesọnmẹ wẹ ẹ, wẹhẹ ẹ d'a chụn ẹjan hụ n'ọ wụrụ ishin hụn a sụọ Osolobuẹ.
22
Agbọ ọwụlẹ, nwa Ẹrọnụ hụn rị ọnọdị onyẹ isi nchụn-ẹjan wụ onyẹ sikọ d'a chụn ẹjannị. O sikọ d'a wụchanrịn nke Osolobuẹ ogẹn ile wẹ chụn a jẹnrin ejẹn, wẹ k'a dụnchanrịn a nwan ọkụn.
23
Wẹ k'a dụnchanrịnrịrị oyiye-ọka ọwụlẹ onyẹ nchụn-ẹjan wẹhẹni Osolobuẹ ọkụn. Erikọ w'a.”
24
Osolobuẹ nọ sị Mozizi,
25
“Sị Ẹrọnụ lẹ ụmụ a: Lee ni iwu ẹjan-njọ: ebe wẹ nọ e gbu anụ wẹ gi a chụn ẹjan w'a dụn ọkụn kẹ wẹ k'a nọzị e gbu anụ wẹ gi a chụn ẹjan-njọ; ẹjan rị okẹn nsọ k'ọ wụ.
26
Onyẹ nchụn-ẹjan hụn chụnn'a k'e ri ẹ; ebe rị nsọ imẹ ezi Ọdụ-ozuzu kẹ w'a nọ ri ẹ.
27
Ihiẹn ọwụlẹ hụarị anụ ẹjan-njọ k'e họnrin ihiẹn w'a sọ wẹ k'e gbu; ẹdeke ẹ ọwụlẹ gbakpu ẹwuru, ebe rị nsọ kẹ w'a nọ sụ a.
28
Omẹni ite-ụrụa kẹ wẹ gi shi anụ a, wẹ k'e tikpọrịrị a; kanị omẹni ite igwe-bronzu kẹ wẹ gi shi ẹ, a kọchanpụchanrịn w'a, gi mirin ṅanchan a.
29
Okẹnnyẹ ọwụlẹ rị ikpụlọ onyẹ nchụn-ẹjan nwọn ikẹn ri ẹ; ihiẹn rị okẹn nsọ k'ọ wụ.
30
Kanị ẹrikọkwọ wẹ anụ ẹjan-njọ ọwụlẹ wẹ webanhan ẹdeke ẹ imẹ Ọdụ-nsọ kẹti-kẹti d'e gi ẹ gbarị isi imẹ Ebe rị nsọ; wẹ k'a dụnrịrị a ọkụn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes