Ri awaj ri chi'm u mac ri macunic rajawaxic cätok' u kul pa ri c'olbal jawije' ri quepil wi ri awaj ri quechi'xic rech queporoxic are c'u ri u quiq'uel rajawaxic cachicox puwi' xukuje' chrij ri porobal.
Ri tabal tok'ob ri u mac rech ri chak'maquil xak junam ruc' ri tabal tok'ob ri u mac rech ri macunic, e are tak c'ut ri pixab xak e junam chque qui cabichal: ri chi'm cux na rech ri cojol tabal tok'ob ri cäpatanij che u rikic ri sachbal macaj.
Xukuje' ronojel sipanic ri cächak'ajisax chupam ri jorno, xukuje' ronojel ri cachak'ajisax pa t'uy o pa xarten, cäcanaj che ri cojol tabal tok'ob ri cäjachow ri sipanic.
We ri tabal tok'ob rech u ya'ic maltioxinic, caxlanwa cächi'x na man cäya' ta ch'am ruc' yok'om aseit ruc', watz'otz'arisam man cäya' ta ch'am ruc' ri chicom aseit puwi', xukuje' caxlanwa re utzalaj c'äj ri yok'om aseit ruc';
Cätas c'u na jun u tz'akatil che jujun u wäch sipanic ri tasom che ri Ajawaxel cäyataj c'u che ri cojol tabal tok'ob ri cajamin ri u quiq'uel ri tabal tok'ob re utzirisan ib.
Ri u ti'jal ri awaj ri cächi'x che u ya'ic maltioxinic xukuje' re utzirisan ib, rajawaxic cätij pa ri k'ij aretak cajach ri awaj, man c'o ta jun ch'akap cätas can che re ri ucab k'ij.
We c'u ne cächi'x ri awaj che u tz'akatisaxic jun chi'nic, o jun sipanic ri caq'uiy pa anima'aj, rajawaxic u tijic kas pa ri k'ij aretak cäpil ri cächi'xic, ri cäto'taj canok cuya' cätij chucab k'ij;
We c'o jun cätijow ri u ti'jal ri awaj re utzirisan ib che ri urox k'ij, man cäc'amar ta we tabal tok'ob ri' rumal ri Ajawaxel; man c'o ta cupatanij che ri xyo'wic ri cätijowic we ti'j ri' cäbe ri mac chrij.
Ri winak ri cuchap apachique jasach ri tz'il we u tz'ilol winak, o u tz'ilol awaj o apachique tz'il ri cuya' muluwibal c'u'x, cutij c'u re ri ti'j re ri tabal tok'ob re ri utzirisan ib ri jachom che ri Ajawaxel, we winak ri' quesax na chquixo'l ri u winakil.”
Cuc' ri kas e u k'ab cuc'am ulok chuwäch ri Ajawaxel ri sipanic ri cäporoxic: ri xepo ri c'o che ri uwo c'uxaj; ri kas uwo c'uxaj che u banic chuwäch ri Ajawaxel jas ri nak'atal u banic che u jachic.
chque c'ut ri qui tabal tok'ob re utzirisan ib ri aj israelib, ri caquiban chwe nu c'amom ri uwo c'uxaj jacha' sipanic ri nim u k'ij xukuje' ri ra' ri awaj ri tasom, e nu yo'm c'u che ri cojol tabal tok'ob ri Aaron, xukuje' chque ri e rija'lil are wa' ri cäya' chque amak'el ri quesax chque ri qui sipanic ri aj israelib.
Are wa' ri cärechbej ri Aaron xukuje' ri cäquechbej ri e rija'lil, ri quesax chque tak ri sipanic ri queporox chuwäch ri Ajawaxel, cachapletaj bic pa ri k'ij aretak quetas che cojol tabal tok'ob chuwäch ri Ajawaxel,
ri Ajawaxel xtakanic chi ri aj israelib caquiya' chque, kas pa ri k'ij aretak xebutaso, pixab wa' ri caquitz'akatisaj ri ri tataxelab xukuje' ri e qui c'ojol.
Are pixab wa' che qui ya'ic ri tabal tok'ob ri quechajirisaxic, ri sipanic tak re c'äj, ri tabal tak tok'ob u mac rech ri mac, ri tabal tak tok'ob u mac rech ri chak'maquil, ri sipanic tak re tastajic ri tabal tak tok'ob re utzirisan ib;
are wa' ri takanic ri xuya' ri Ajawaxel che ri Moises puwi' ri juyub Sinai, aretak xubij chque ri aj israelib pa ri chaki'j uwo sak aj Sinai chi cäquiya' sipanic che.”