“Olok Harun ban na'-ana'na ka adha'anna labangnga Tang Kemah Socce, ngeba pangangguyya imam, mennya' upacara, sape lake' se gi' ngodha settong kaangguy kurban pangamponanna dusa, dumba lake' dhadhuwa' ban roti se ta' eragi'i sabudhak.
Saellana jareya Mosa masangngagi pangangguyya imam ka Harun: kameja, sabbu' ban juba. Bariya keya efod se etaleyagi ka tengngana ngangguy sabbu' dhari kaen se alos.
Serana esurbane, ban surbanna epasange jamang emmas, se nandha'agi ja' Harun la daddi kaagunganna PANGERAN. Jareya kabbi elampa'agi Mosa menorot papakonna PANGERAN ka salerana.
Mennya' jareya eketessagi sakone' pettong kale ka attassa mezba ban parabudda, bariya keya ka cemmong ban dhasarra. Kalaban cara se kantha jareya kabbi eatorragi ka PANGERAN malolo.
Samarena jareya tra-pottrana Harun laju epakon nyander ka seddi'anna sarta pas epangagem kameja ban sabbu'. Serana padha esurbane akantha se edhabuwagi PANGERAN ka salerana.
Saellana jareya Mosa laju mondhut sape lake' se gi' ngodha kaangguy kurban pangamponanna dusa. Harun ban tra-pottrana nompangngagi astana e cethagga sape jareya.
Sape jareya bi' Mosa pas esambelli, dharana epondhut sabagiyan, ebuliddagi bi' garigi'na ka dhu'-tandhu' e saneyap padduna mezba. Kalaban cara se kantha jareya mezba jareya eatorragi ka PANGERAN malolo. Lebbina dharana eserammagi ka dhasarra mezba. Kantha jareya carana mezba jareya esocceyagi ban eatorragi ka PANGERAN malolo.
Dhari sape se esambelli jareya Mosa mondhut sakabbinna gaji se notobi essena tabu'na, bingselan ban gajina, sarta bagiyanna atena se paleng bagus. Jareya kabbi eobbar e attassa mezba.
Dumba jareya laju ethok-ketthok, essena tabu'na ban sokona ebacco bi' aeng. Cethagga, gajina, ban karena dagingnga eobbar kaangguy kurban obbaran e attassa mezba akantha se edhabuwagi PANGERAN ka salerana. Bauna kurban obbaran jareya masenneng panggaliyanna PANGERAN.
Bi' Mosa dumba jareya laju esambelli. Dharana epondhut sakone', ebuliddagi ka karna kanganna Harun, ka pol-empolanna asta kanganna sarta pol-empolanna pada kanganna.
Tra-pottrana Harun pas epakon nyander ka seddi'anna, dharana dumba gella' ebuliddagi keya sakone' ka karna kanganna, ka pol-empolanna asta kanganna, sarta pol-empolanna pada kanganna. Salebbina dharana eserammagi ka sakalenglengnga penggirra mezba.
Dhari cettheng se aesse roti se ta' eragi'i se la eatorragi ka PANGERAN, Mosa mondhut roti settong se kandel se eola ban mennya' sarta roti se tepes settong. Roti jareya esaba' e attassa gajina ban pokang kanganna.
Saellana jareya kakanan buru bi' Mosa epondhut dhari reng-oreng jareya, pas eobbar e mezba, epabareng ban kurban obbaran kaangguy kurban pantahbisan. Bauna kurban jareya masenneng panggaliyanna PANGERAN.
Saellana jareya Mosa mondhut sabagiyan dhari mennya'na opacara ban sabagiyan dhari dhara se badha e attassa mezba, laju eketessagi ka Harun ban tra-pottrana sarta ka rasoganna. Kalaban opacara jareya reng-oreng jareya sarta rasoganna bi' Mosa eatorragi ka PANGERAN malolo.
Dhabuna Mosa ka Harun ban tra-pottrana, “Ola daging kurban jareya e adha'anna labangnga Kemah Socce, pas kakan e jadhiya ban rotina kurban pantahbisan se badha e dhalem cettheng rowa, menorot se epakonnagi bi' PANGERAN.
Pettong are abidda, seyang ban malem, ba'na kodu neng e adha'anna labangnga Kemah kaangguy ngalakone pa-apa se epakonnagi PANGERAN. Mon ba'na ta' atoro', ba'na bakal mateya. Kantha jareya dhabuna PANGERAN ka sengko'.”