×

អាល់គីតាប 2014

លេវីវិន័យ ៩

1
នៅ​ថ្ងៃ​ទី​ប្រាំ‌បី ម៉ូសា​កោះហៅ​ហារូន កូន​ប្រុស​របស់​គាត់ និង​អស់​លោក​អះលី‌ជំអះ​អ៊ីស្រ‌អែល​ឲ្យ​មក។
2
គាត់​មាន​ប្រសាសន៍​ទៅ​កាន់​ហារូន​ថា៖ «ចូរ​យក​កូន​គោ​ឈ្មោល​មួយ​ល្អ​ឥត​ខ្ចោះ​សម្រាប់​ធ្វើ​គូរបាន​រំដោះ​បាប និង​ចៀម​ឈ្មោល​មួយ​ល្អ​ឥត​ខ្ចោះ សម្រាប់​ធ្វើ​ជា​គូរបាន​ដុត ហើយ​នាំ​សត្វ​ទាំង​ពីរ​ទៅ​ជូន អុលឡោះ‌តាអាឡា ។
3
បន្ទាប់​មក ត្រូវ​បង្គាប់​ជន‌ជាតិ​អ៊ីស្រ‌អែល​ថា: “ចូរ​នាំ​យក​ពពែ​ឈ្មោល សម្រាប់​ធ្វើ​ជា​គូរបាន​រំដោះ​បាប ព្រម​ទាំង​កូនគោ និង​កូន​ចៀម​មួយ​ដែល​មាន​អាយុ​មួយ​ខួប ល្អ​ឥត​ខ្ចោះ សម្រាប់​ធ្វើ​ជា​គូរបាន​ដុត
4
ហើយ​យក​គោ​ឈ្មោល​មួយ និង​ចៀម​ឈ្មោល​មួយ​ជូន អុលឡោះ‌តាអាឡា ​ជា​គូរបាន​មេត្រី​ភាព រួម​ជា​មួយ​ជំនូន​ម្សៅ​លាយ​នឹង​ប្រេង ដ្បិត​នៅ​ថ្ងៃ​នេះ អុលឡោះ‌តាអាឡា ​នឹង​បង្ហាញ​ទ្រង់​នៅ​ចំពោះ​មុខ​អ្នក​រាល់​គ្នា”»។
5
ជន‌ជាតិ​អ៊ីស្រ‌អែល​នាំ​យក​ជំនូន​ទាំង​ប៉ុន្មាន​ដែល​ម៉ូសា​បាន​បង្គាប់ មក​ដាក់​នៅ​ខាងមុខ​ជំរំ​ជួប​អុលឡោះ‌តាអាឡា។ សហគមន៍​ទាំង​មូល​នាំ​គ្នា​ចូល​មក​ឈរ នៅ​ចំពោះ អុលឡោះ‌តាអាឡា ។
6
ម៉ូសា​មាន​ប្រសាសន៍​ថា៖ «អ្វីៗ​ដែល អុលឡោះ‌តាអាឡា ​បង្គាប់ ចូរ​នាំ​គ្នា​ធ្វើ​តាម​ទៅ នោះ អុលឡោះ‌តាអាឡា ​នឹង​សំដែង​សិរី‌រុង‌រឿង​ឲ្យ​អ្នក​រាល់​គ្នា​ឃើញ»។
7
ម៉ូសា​មាន​ប្រសាសន៍​ទៅ​កាន់​ហារូន​ថា៖ «ចូរ​ទៅ​ជិត​អាសនៈ​ធ្វើ​គូរបាន​រំដោះ​បាប​របស់​បង និង​រំដោះ​បាប​របស់​ប្រជា‌ជន ហើយ​ធ្វើ​គូរបាន​ដុត ដើម្បី​សូម​ទ្រង់​លើក​លែង​ទោស​បង និង​ប្រជា‌ជន​ឲ្យ​បាន​រួច​ពី​បាប​ដែរ។ ចូរ​ជូន​ជំនូន​របស់​ប្រជា‌ជន ហើយ​ធ្វើ​ពិធី​រំដោះ​បាប​ឲ្យ​ពួក​គេ ស្រប​តាម​បញ្ជា​របស់ អុលឡោះ‌តាអាឡា »។
8
ហារូន​ក៏​ចូល​ទៅ​ជិត​អាសនៈ ហើយ​អារ​ក​កូន​គោ​សម្រាប់​រំដោះ​បាប​របស់​គាត់​ផ្ទាល់។
9
កូន​របស់​គាត់​លើក​ឈាម​សត្វ​ជូន​គាត់ ហើយ​គាត់​ក៏​ជ្រលក់​ម្រាម​ដៃ​ក្នុង​ឈាម រួច​លាប​លើ​ស្នែង​អាសនៈ។ បន្ទាប់​មក គាត់​ចាក់​ឈាម​ដែល​នៅ​សល់ ត្រង់​ជើង​អាសនៈ។
10
គាត់​ដុត​ខ្លាញ់​ក្រលៀន និង​អ្វីៗ​ដែល​នៅ​ជាប់​នឹង​ថ្លើម​របស់​សត្វ​សម្រាប់​ធ្វើ​គូរបាន​រំដោះ​បាប​នោះ នៅ​លើ​អាសនៈ ដូច អុលឡោះ‌តាអាឡា ​បាន​បង្គាប់​មក​ម៉ូសា។
11
រីឯ​សាច់ និង​ស្បែក គាត់​យក​ទៅ​ដុត​នៅ​ក្រៅជំរំ។
12
ហារូន​អារ​ក​ចៀម​ឈ្មោល ដែល​ជា​គូរបាន​ដុត។ កូន​របស់​គាត់​យក​ឈាម​ជូន​គាត់ ហើយ​គាត់​ក៏​ប្រោះ​ឈាម​នោះ​ទៅ​លើ​ជ្រុង​ទាំង​បួន​របស់​អាសនៈ។
13
ពួក​គេ​យក​សាច់​ដែល​កាប់​ជា​ដុំៗ និង​ក្បាល​មក​ជូន​គាត់ ហើយ​គាត់​ដុត​វា​នៅ​លើ​អាសនៈ។
14
គាត់​លាង​ពោះ‌វៀន និង​លាង​ជើង​របស់​វា រួច​ដុត​ទាំង​អស់​នៅ​លើ​អាសនៈ​ពី​លើ​គូរបាន​ដុត។
15
បន្ទាប់​មក គាត់​យក​ជំនូន​របស់​ប្រជា‌ជន​ជូន អុលឡោះ‌តាអាឡា គឺ​គាត់​យក​ពពែ​ឈ្មោល​ដែល​ប្រជា‌ជន​ធ្វើ​ជា​គូរបាន​រំដោះ​បាប​មក ហើយ​អារ​ក​វា ធ្វើ​ដូច​គូរបាន​រំដោះ​បាប​មុន​ដែរ។
16
គាត់​ធ្វើ​គូរបាន​ដុត តាម​ហ៊ូកុំ។
17
គាត់​ជូន​ជំនូន​ម្សៅ ដោយ​ម្សៅ​មួយ​ក្តាប់​យក​ម្សៅ​មួយ​ក្តាប់​ដុត​នៅ​លើ​អាសនៈ បន្ថែម​ពី​លើ​គូរបាន​ដុត​ដែល​គេ​ធ្វើ​នៅ​ពេល​ព្រឹក។
18
គាត់​អារ​ក​គោ​បា និង​ចៀម​ឈ្មោល​ដែល​ប្រជា‌ជន​យក​មក​ធ្វើ​ជា​គូរបាន​មេត្រី​ភាព។ កូន​របស់​គាត់​យក​ឈាម​ជូន​គាត់ ហើយ​គាត់​ក៏​ប្រោះ​ឈាម​នោះ​នៅ​លើ​ជ្រុង​ទាំង​បួន​របស់​អាសនៈ។
19
ពួក​គេ​យក​ខ្លាញ់​របស់​គោ​បា និង​ចៀម​ឈ្មោល​ព្រម​ទាំង​កន្ទុយ ខ្លាញ់​ដែល​នៅ​ជាប់​ពោះ‌វៀន​ក្រលៀន និង​ថ្លើម
20
ដាក់​នៅ​លើ​សាច់​ទ្រូង ហើយ​ហារូន​ដុត​ខ្លាញ់​ទាំង​នោះ​នៅ​លើ​អាសនៈ។
21
បន្ទាប់​មក ហារូន​លើក​សាច់​ទ្រូង និង​ភ្លៅ​ស្តាំ​ជូន អុលឡោះ‌តាអាឡា ដូច​ម៉ូសា​បាន​បង្គាប់។
22
ក្រោយ​ពី​បាន​ធ្វើ​គូរបាន​រំដោះ​បាប​គូរបាន​ដុត និង​គូរបាន​មេត្រី​ភាព​ចប់​សព្វ​គ្រប់​ហើយ ហារូន​លើក​ដៃ​ជូន​ពរ​ប្រជា‌ជន រួច​ចុះ​មក​វិញ។
23
ម៉ូសា និង​ហារូន​នាំ​គ្នា​ចូល​ក្នុង​ជំរំ​ជួប​អុលឡោះ‌តាអាឡា រួច​ចេញ​មក​វិញ ជូន​ពរ​ប្រជា‌ជន។ ពេល​នោះ សិរី‌រុង‌រឿង​របស់ អុលឡោះ‌តាអាឡា ​លេច​មក​ឲ្យ​ប្រជា‌ជន​ទាំង​មូល​ឃើញ
24
គឺ​មាន​ភ្លើង​ចេញ​ពី អុលឡោះ‌តាអាឡា ឆេះ​គូរបាន​ដុត និង​ដុំ​ខ្លាញ់​នៅ​លើ​អាសនៈ។ ពេល​ប្រជា‌ជន​ទាំង​មូល​ឃើញ ដូច្នេះ ពួក​គេ​បន្លឺ​សំឡេង​អបអរ‌សាទរ រួច​ក្រាប​ចុះ​អោន​មុខ​ដល់​ដី។
Khmer Bible 2014
2014 United Bible Societies, UK
:
រក្សាទុកកំណត់ចំណាំ