×

Bibilia Ilagano Lya Kale 2019

Amosi 2

1
Ū SEEBA alīhaya gīkī, “Kūlwa būhūbi wa bana Moabu, ū būhūbi wabo ūbo balemile kūbūleka, natūbūhama ū būpelanu bone. Nguno bakoocha maguha ga ntemi wa Edomu gūūnogela gūbiza gītī swakala.
2
Nakūtūma moto ī Moabu, gūjinogoteje nī ng'hambī jaamo ja bashilikale. A bana Moabu bakūshila kūcha ng'wikanza lya ng'wano gwa būlūgū na kūng'ang'aala kwilaka lya nhaaninga.
3
Nakūnyagaja ū nsugi waamo, na a batongeeji baamo nababūlage hamò nang'hwe.” Alīhaya SEEBA.
4
Ū SEEBA alīhaya gīkī, “Kūlwa būhūbi wa bana Yuda, ū būhūbi wabo ūbo balemile kūbūleka, natūbūhama ū būpelanu bone. Nguno bashilema ī shilagīlo sha ng'wa SEEBA, na a malange gakwe yaya ū kūgadima, nguno ya kūhūmbūūlwa na bamulungu ba nyalomolomo, abo bakūlūgenji babo baabalondeelaga.
5
Nakūtūma moto ī Yuda, gūjinogoteje nī ng'hambī ja bashilikale ī ja Yelusalemu.”
6
Ū SEEBA alīhaya gīkī, “Kūlwa būhūbi wa bana Yuda, ū būhūbi wabo ūbo balemile kūbūleka, natūbūhama ū būpelanu bone. A batūngīlīja bakabajinjaga gīkī bapandīke hela, a bagayiwa bayūbakaabanya nūūlū ndaala ibīlī dūhū.”
7
Bakapandagīlaga mitwe ya bahabī gītī bakūpandaga lūbuubu lwa hasī, na a babo bakiboneelagwa batabīītīlaga kūlenganīla nū būtūngīlīja. Namhala na ng'witūnja wakwe bakūsosohajaga lina lyane lyeela kūlwa kūsangīla būjingi halī nkīma ūmò.
8
Ī myenda īyo bakadimaga gīkī ng'handīko h'īyo bakambaga būlī ha ng'walīlo gwene baalaalīla; nū mu numba ja bamulungu babo bakang'welaga moi divai ya kūfuma kū banhū abo bakalyiagwa ihyū.
9
“A Baamoli nakabamala ū kū būtongi wa Baisilaeli, nūūlū īkī baalī balīhu gītī mikoola, na bajaamu gītī mitūndū. Nūgakenaagūla a matwajo gabo ū kwigūlya, nī miji yabo a hasī.
10
Nakang'wenha kūfuma mu sī ya Misili, nūmutonga myaka makūmi anè kwitogolo gīkī nize kūng'winha ī sī ya Baamoli.
11
Na bamò ba mū bitūnja bing'we nūbīīta kūbiza bahangi, bamò ba badinha bing'we būbiza Banazili. Gūtī gwa ng'hana ū gwenūyū bing'we Baisilaeli? Alīhaya SEEBA.
12
Alīyo a Banazili mukayūbinha walwa bang'wa, a bahangi ng'ūyūbalemeja ū kūhanga.
13
Alilūūlū, nakūmushigambīja ūmo igogoteni līkashigambīgījaga ūlū lyokalaga magūnīla ga būsīga.
14
Ū mpeeji jikūngaya ī nhambo, ū wa nguzu atūbiza na nguzu, nūūlū ū nshilikale atūbūpīja ū būpanga bokwe.
15
Ū nasi atīīma nū būta bokwe, ū nshilikale ū mbūūpu mu magūlū atūsegenela; nūūlū ū mpeelela ha falasa atipīja ū būpanga bokwe.
16
Ū mu lūshikū lwenūlo nūūlū a bashilikale abo batakangagwa bakūbuluguta nhambo balī dūūhū manyegu.” Alīhaya SEEBA.
Sukuma Bible 2019
Sukuma Bible Society of Tanzania, 2019
:
Save Notes