×

現代台語譯本漢字版

阿摩司書 3

1
以色列 人啊,著聽我上主責備恁的話: 恁全家是我對 埃及 地導出來的;
2
佇地上萬族中我只有揀恁, 所以我欲因為恁所犯一切的罪刑罰恁。
3
兩個人若無相約, 哪會鬥陣行?
4
獅若無獵物, 豈會佇樹林內哮? 獅仔豚若無得著食物, 豈會佇洞內出聲?
5
活罩若無囥餌, 哪會當著鳥仔? 若無踏著機關, 活罩哪會合起來?
6
城內若有哨角的聲, 住民豈𣍐驚? 城內若有災禍, 豈毋是上主所降?
7
至高的上主計劃欲做代誌, 一定會代先指示伊的僕人先知。
8
獅啲哮, 啥人𣍐驚? 至高的上主講話, 啥人敢無傳達?
9
著佇 亞實突 的宮殿 及 埃及 的宮殿宣布: 著佇 撒馬利亞 的山聚集, 看城內的大擾亂 及內面欺壓人民的事。
10
因為𪜶𣍐曉做正直的代誌; 𪜶的宮殿囤滿用強暴搶來的物。 上主按呢宣告。
11
所以至高的上主按呢講: 有對敵欲來圍困此個地, 攻破你的防衛線, 搶你的宮殿。
12
上主按呢講:親像牧者對獅的嘴搶出來的,干焦兩支羊腳,抑是一塊仔耳仔,佇 撒馬利亞 過奢侈生活的 以色列 人,會當逃脫的嘛是赫呢少。
13
至高的上主 — 萬軍的統帥上帝講: 著聽,著警告 雅各 的後代。
14
我因為 以色列 人犯罪給𪜶刑罰彼日, 我欲毀壞 伯特利 的祭壇; 壇的角會受斬斷,落落地。
15
我欲拆毀𪜶冬天熱天的別莊; 象牙妝飾的厝會受毀滅, 連大間厝都會無去。 上主按呢宣告。
Chinese TTVH 2021
The Bible Society in Taiwan, 2021
:
保存笔记