Allah Jawmiraawo hunori bee senaare muuɗum: “Fakat, nyalɗe ngaran dow mooɗon, haa konne'en ngurtina on bee ngoodi e luttuɓe mooɗon bee kunayel bana liɗɗi.
“Mi yoorni e mi nyolni demetirle mon. Baɓɓatti nyaami jarne mon e gese inabooje mon e ibbe mon e jaytunje mon. Bee non fuu, on lortaaki haa am.” Non Jawmiraawo wi'i.
“Mi neli nyawu kalluŋgu ndaaɓoowu caka mooɗon, bana ɓooyma haa Misra. Mi mbardi suka'en mooɗon bee kaafahi, mi dahi pucci mon. Mi ummini kacceeŋga caŋngeeje mon haa nga nasta kine mon. Bee non fuu, on lortaaki haa am.” Non Jawmiraawo wi'i.
“Mi halki woɗɓe mooɗon bana mi halkiri Sodoma e Gomorra. On laati bana leggel jamnaaŋgel ngel goɗɗo wurtini diga yiite. Bee non fuu, on lortaaki haa am.” Non Jawmiraawo wi'i.
Ndaa, kaŋko o waɗi kooseeje, o tagi henndu. O ɗon anndina neɗɗo ko o annini. O ɗon wartira jayŋgol fajiri nyiɓre. O ɗon yaaɓa dow towɗe duniyaaru. Innde maako Jawmiraawo, Allah honooɓe asama.