हे सामरियाका नारीहरू हो, तिमीहरूले सुन। तिमीहरू, जो बाशानका राम्ररी घाँस खाएका गाईहरूझैँ मोटाएका छौ, दरिद्रहरूलाई लुट्दछौ, गरीबहरूलाई सताउँदछौ र आफूले पिउनलाई लोग्नेसित मद्य मागिबस्छौ,
सार्वभौम परमप्रभु पवित्र हुनुहुन्छ र उहाँले यस्तो प्रतिज्ञा गर्नुभएको छ, “त्यो समय अवश्य आउनेछ, जब तिमीहरू अङ्कुसेद्वारा घिस्स्याइनेछौ। तिमीहरू प्रत्येक बल्छीमा परेका माछाझैँ तानिनेछौ।
परमेश्वर परमप्रभु भन्नुहुन्छ, “हे इस्राएलका मानिसहरू हो! तिमीहरूले पाप गर्नैपर्छ, होइन? त्यसो भए बेथेलका देव-स्थानमा जाओ र त्यहाँ पाप गर। गिलगालमा जाओ र त्यहाँ सकेसम्म पाप गर। त्यहाँ हरेक बिहान बलि चढाउने पशुहरू लैजाओ र तीन-तीन दिनमा आ-आफ्ना दशांश चढाओ।
धन्यवाद बलिको रूपमा खमिर हालेको रोटी चढाओ र आफ्ना इच्छाले चढाएका थप भेटीहरूबारे घमण्डले फुल्दै अरूलाई सुनाओ। त्यस्तै कुरा गरी हिँड्न तिमीहरू मन पराउँछौ, होइन र?
तिमीहरूको अन्न काट्ने बेला हुनुभन्दा तीन महिनाअघि जब खेतमा पानीको ठूलो खाँचो थियो, तब मैले वर्षा बन्द गरिदिएँ। मैले एउटा सहरमा वर्षाको पानी पठाइदिएँ तर अर्को सहरमा पठाइनँ। एउटा खेतमा पानी पर्यो तर अर्कोमा परेन र खेत सुखा भयो।
परमप्रभु भन्नुहुन्छ, “मैले सदोम र गमोरालाई नाश पारेझैँ तिमीहरूमध्ये कति जनालाई नाश पारें। बाँकी रहेकाहरूचाहिँ आगोको भट्टीबाट निकालेको अगुल्टोझैँ भए, तापनि तिमीहरू मकहाँ फर्केर आएनौ।
पर्वतहरू बनाउनुहुने र बतास सृजनुहुने परमेश्वर नै हुनुहुन्छ। उहाँले आफ्ना विचार मानिसहरूलाई प्रकट गर्नुहुन्छ। उहाँले नै दिनलाई रात पार्नुहुन्छ। उहाँले पृथ्वीका उच्च-उच्च ठाउँहरूमा आफ्ना पैतालाले टेक्नुहुन्छ। ‘परमप्रभु सर्वशक्तिमान् परमेश्वर’ उहाँको नाम हो।