|
| 1 |
|
| Imwe ab'omuryango gwa Isiraeli, nimuhurire eki kigambo eki ndikubagambaho nintonzya nti: |
|
| 2 |
|
| Isiraeli omwishiki oshugaine agwire kandi tarigaruka kwimuka. |
|
| 3 |
|
| Manya Mukama Ruhanga naagira ati: Orurembo orurihuruza abantu rukumi ruryatsigaza igana abaritabaaruka, n'orurihuruza abantu igana, haryatabaarukaho ikumi ab'omuryango gwa Isiraeli. |
|
| 4 |
|
| Nyakubaho naagira ab'omuryango gwa Isiraeli ati: Munsherure, mubone kugira amagara. |
|
| 5 |
|
| Kwonka mutansherurira Beteli, mutataaha Giligaali, n'obu kwakuba okwambuka Beerisheba. Ahabw'okuba buzimazima Abaagiligaali baryazaahibwa, na Beteli ehindukye busha. |
|
| 6 |
|
| Musherure Nyakubaho mubone kugira amagara, atakaayakira omu b'omuryango gwa Yosefu nk'omuriro, gukootsya Beteli, hakabura owaaguraaza. |
|
| 7 |
|
| Imwe abahindaguturana eby'oburyo, mukamiisha eby'okuhikiirira, |
|
| 8 |
|
| Ogwo owaahangire enyonyoozi Kakaaga n'engabo ya Orioni, ohindura omwirima ndindindi obusheeshe, nyomushana akagihindura nyekiro; ogwo otuma amaizi g'enyanja, akagashandaaza aha nsi; Nyakubaho niryo iziina rye. |
|
| 9 |
|
| Niwe areetera ab'amaani kukinuka, ebigo bigumire bikabona kucwekyerera. |
|
| 10 |
|
| Manya orikubahanira omu irembo bamwanga, kandi ogamba amazima abatama. |
|
| 11 |
|
| Mbwenu nk'oku muribatiriire abooro, mukabagyema kutoija engano zaabo; amaju gu mwombekyeise amabaare gacweregyereire, timurigatuuramu, n'emisiri mirungi y'emizaabibu ei muhingire timurinywa viino yaayo. |
|
| 12 |
|
| Manya nimmanya ebicumuro byanyu ku biri bingi, n'ebibi byanyu ku birengyesereize, imwe ababonabonesa abahikiriire, mukarya enguzi, kandi abakyene mukabateereza enkokora omu irembo. |
|
| 13 |
|
| Nikyo orikwerinda aricecekyera omu bunaku obwo, ahabw'okuba buryaba buri obunaku bubi. |
|
| 14 |
|
| Mwitanire ebirungi, bitari ebibi, mubone kugira amagara; na Mukama Ruhanga ow'amahe nibwo ariguma naimwe, nk'oku mukigamba. |
|
| 15 |
|
| Mwangye ebibi, mukunde ebirungi. Muhamye eby'obwinganisa muri omu irembo. Obundi Mukama Ruhanga ow'amahe akaagirira embabazi aba Yosefu abaatsigaireho. |
|
| 16 |
|
| N'ahabw'ekyo oku nikwo Mukama Ruhanga ow'amahe arikugamba. Nyakubaho ogwo naagira ati: Ahu abantu bateeranira haryabaho okuborooga, n'omu nguuto zoona abantu baryagira bati: Ai bambe! Ai bambe! Beete abahingi kwija kucura, n'abarikumanya kutonzya kwija kuborooga. |
|
| 17 |
|
| Kandi omu misiri y'emizaabibu yoona haryabamu okuborooga ahabw'okuba ndyabarabamu nyizire kubafubira. Nyakubaho nikwo arikugamba. |
|
| 18 |
|
| Ebishi imwe abarikwetenga eizooba rya Nyakubaho muryakareeba! Mbwenu eryo izooba rya Nyakubaho nimuryendera ki? Ka n'ery'omwirima, ritari ry'omushana. |
|
| 19 |
|
| Riri nk'oku omuntu yaakuhunga entare, akabugana edubu; nari nk'oku yaakutaaha omu nju, akeegamiza omukono gwe ekisiika, haza enjoka ekamutema. |
|
| 20 |
|
| Mbwenu eizooba rya Nyakubaho t'eizooba ry'omwirima, ritari ry'omushana? T'ery'ekizima ekitarimu okuhweza kwona? |
|
| 21 |
|
| Nyanga, kandi ngaya amagyenyi gaanyu, ntaireho n'okutashemerererwa ebiteerane byanyu ebikuru. |
|
| 22 |
|
| N'obu mwakuntambira ebitambo bicwekize, n'eby'esaano, tinkaabiikiriza, Kandi tinkaayeta ha bitambo byanyu byokurya kumwe, eby'amatungo gaanyu g'ebishaju. |
|
| 23 |
|
| Nimuunyiheho orwari rw'ebyeshongoro byanyu. Tindikwija kutega okutu ebijumeero by'enanga zaanyu. |
|
| 24 |
|
| Kureka murekye eby'obwinganisa bihimintikye nk'amaizi, n'eby'okuhikiirira bibe nk'omugyera gutarikwoma. |
|
| 25 |
|
| Imwe Baisiraeli 'mwe, emyaka makumi ana ei naamazire naimwe omu ihamba, mukantambira ebitambo n'okundeetera emitoijo? |
|
| 26 |
|
| Mbwenu nimwija kuheeka ebishushani bi mwayeheesheire: ekya Sakuuti omugabe waanyu, n'ekya Kaiwaani ruhanga waanyu enyonyoozi. |
|
| 27 |
|
| Nikyo ndaabazaahize, nkabatwara seeri ya Damasiko. Nikwo Nyakubaho arikugira, ou eiziina rye aba Ruhanga ow'amahe. |
|
|
|
|