सिय्योन क तू पचन्क मँ स कछू क जिन्नगी बहोत अराम क अहइ। सामरिया पर्वत क कछू लोग अपने क सुरच्छित महसूस करत हीं। मुला तू पचन पइ अनेक मुसीबतन अइहीं। रास्ट्रन क सब स उत्तिम नगर क तू पचे सम्मानित लोग अहा। “इस्राएल क लोग” निआव पावइ बरे तोहरे पचन्क लगे आवत हीं।
जा अउ कलने क लखा। हुआँ स बिसाल नगर हमात क जा। पलिस्ती सहर गत क जा। का तू पचे इ सबइ राज्यन स बढ़िया अहा? नाहीं। ओनकर पहँटा तोहरे पचन्क देसे स बड़का अहइँ।
मुला तू पचे सबहिं बिलासन क भोगा करत अहा। तू पचे हाथी दाँते क सेज पइ सोवत अहा अउर अपने बिछौना पइ आराम करत अहा। तू पचे गोरूअन क झुण्ड मँ स नरम मेमनन अउ बाड़न मँ स नवा बछवा खात अहा।
तू पचे सुन्नर पिआलन मँ दाखरस पिआ करत अहा। तू पचे सब स उत्तिम तेलन मँ स आपन मालिस करत अहा अउर तू पचन्क एकरे बरे घबराहट भी नाहीं कि यूसुफ क परिवार नस्ट कीन्ह जात अहइ।
का घोड़न सिलाखंडन पइ दउड़त हीं? नाहीं। का लोग समुदर क बर्धन स जोत सकत हीं? नाहीं। तउ भी तू पचे हर चीज क उलट-पलट देत अहा। तू पचे अच्छाई अउ निआव क जहर मँ बदल देत अहा।