Aw minw siginin be hɛrɛ la * Siyɔn dugu kɔnɔ, bɔnɛ ye aw ta ye! Aw minw be lafiya la Samari kulu kan, bɔnɛ ye aw ta ye! Aw minw kɛra mɔgɔbabaw ye Isirayɛlidenw cɛma, minw ka yɔrɔ ɲɔgɔn tɛ, siya wɛrɛw cɛma, Isirayɛlidenw be to ka taga bɔ aw minw fɛ, bɔnɛ ye aw ta ye!
Aw ye tɛmɛ Kaline ka filɛli kɛ. N'aw bɔra yen, aw be taga Amati duguba nin na, ka bɔ yen ka taga Gati dugu la, Filisi jamana na. Olu ka fisa n'aw ka maraw ye wa? Olu ka maraw ka bon n'aw taw ye wa?
Masaba, Setigi Ala y'a fɔ k'a gwɛlɛya ko: «Yakuba kɔmɔgɔw ka yɛrɛboɲa ka go ne ye haali! U ka dakamana soow koo ka go ne ye! Ne bena Samari dugu bɛɛ to a juguw bolo.
Ni somɔgɔw dɔ y'u suu ta ko a be taga u jɛni, a tɔɲɔgɔn min tora soo kɔnɔ, a ben'a kaan to ale ma ko: ‹Mɔgɔ wɛrɛ be sɔrɔ i fɛ yen wa?› A ben'a jaabi ko: ‹A banna! Je! An man kan ka Masaba tɔgɔ wele dɛ!› »
Masaba, Setigi Ala ko: «Ne le bena siya dɔ kɔnɔnasu k'a bila aw Isirayɛlidenw na. O siya nin bena aw tɔɔrɔ k'a ta kɔgɔdugu ɲafan fɛ Lebowamati fɔɔ ka n'a bila Araba kɔɔ la worodugu ɲafan fɛ.»