Bwa eng’ ichek che mi kalyet eng’ Sion, ak eng’ ichek che ribotin che mi tulwetab Samaria, bik che toogunotin che bo che eechen eng’ bororiosiek, che bwanjin gotab Israel!
Osiirte oba Kalne, ak ogeer; ak obe eng’ oloto agoi Hamat ne o: yeityo ochorjige Gat ne bo Pilistik; tos miachen ichek kosiir bounatosiechu? Anan tos o kiwotenywa kosiir neng’wong’?
ichek che ruitos eng’ itogusiek che bo kelekab belek, ak koiitogei eng’ tugukwak che kilyeldoe, che amei arekab kechir che bo akwet, ak moek che mi biusiek;
Kigoyosiechigei Kiptaiyat Jehovah, mwaei Jehovah, inendet Kamuktaindet ne bo lugosiek, kole: Aweche menotetab Jakobo, ak aweche gorikyik che bo laitoriat: asoru anyun nganaset koboto tugul che mi orit.
Ak ye sut chi imamet, ne inendet ne beelei, si koib kowek komong’ eng’ go, ak kolenji inendet ne mi komoswek che bo orit che bo got, Tos ta omi ak age? Ak kole inendet, Achicha; kole anyun, Sis; amu magichamwech kemwa kainetab Jehovah.
Amu, ogeero, ang’eeti bororiet obarge, ee, gotab Israel, mwaei Jehovah, Kamuktaindet ne bo lugosiek; ak konyalilak koboch ole kibunei kebendi Hamat agoi kererut ne bo Araba.