Pwo eng' icheek che mi kaalyeet eng' Zion, ak eng' icheek che kasei kole riibootin eng' tulweetap Samaria, piik che taagunotiin che po che eecheen eng' pororyosyek, che pwaanjin kootap Israel!
Osiirte oba Kalne, ak ogeer; ak obe eng' olooto agoi Hamath ne oo; yeityo ochoorchigei Gath ne po Philistiik. Tos myachen icheek kosiir pounatosyechu? Anan tos oo kiwotennywa kosiir neng'wong'?
Pwo eng' icheek che ruitos eng' itogusyek che po kelegap peeleek, ak koiitogei eng' tuguukwak che kilyeldoe, che amei aaregap keechiir che po akweet, ak moek che mi piusyek;
Ki koyosyechigei Kiptaiyat Kamuktaindet ne Toroor, mwaei Kamuktaindet ne Toroor, ineendet Kamuktaindet ne po lugoosyek, kole: “Aweche menoteetap Jakobo, ak aweche kooriikyik che po laitoryat. Asaru anyun nganaseet kobooto tugul che mi oriit.”
Ak ye sut chii `imamet, ne ineendet ne peelei muusto, si koip kawek komong' eng' ko, ak koleenji ineendet ne mi komoswek che po oriit che po koot, “Tos ta omi ak age?” Kowol anyun kole, “Achicha!” Kole anyun, “Siis! Amu ma ki chamwech kemwa kainetap Kamuktaindet ne Toroor.”
Mwaei Kamuktaindet ne Toroor, Kamuktaindet ne po lugoosyek, kole, “Ee, kootap Israel, nai ni ile, ang'eeti pororyet si obargei, ak konyaliilak kobooch ole kibunei kebendi Lebo-hamath agoi kereruut ne po Arabah.”