La Soaala sok-m lame: «Amos, yaa bõe la f ne?» Tɩ mam leoke: «Peoog sẽn pid ne tɩɩs bi-moaama!» Dẽ la Naaba-Wẽnd yeel maam: «M nebã, a Israyɛl kamba, bɩɩme n sek b bob n looge. M kõn le bas b beegre n ka sɩbg-b ye.
Maam n yete, maam, Naaba-Wẽnde, tɩ m sẽn na n yik ne b raare, bãng-y tɩ kʋ-yãbdba sẽn be dĩma zaakẽ wã na wiis b wiisgu. Kũum sẽn sam taab la b na n yãende, kũum sẽn dɩg zĩig zãng la b na n yãende. Sẽn lebẽ fãa, tẽnga na n yɩɩ sɩɩ.»
yaa yãmb n gomd woto: «Kiu-paalga na n looga da-bʋre, tɩ d koos d koodo? Vʋʋsg raara na n looga da-bʋre tɩ d pags d baoa?» Yãmb yaool n boogda y petã, y bõn-magdi wã magdame bala n dʋʋsd daaga.
M na kɩt tɩ y kibs rãmba lebg sũ-sãanga, tɩ y yɩɩla lebg kũmkũm. M na sẽgen-y sũ-pa-noang futu, la zuta fãa zoobd na kõoge. Na n yɩɩ wala ma-bi-yend kʋʋre. Daara na n kell n yɩɩ sũ-beedo ne sũ-beedo!»
Daar n wate, Soaal Wẽnd n yeele, tɩ m na n tool kom, tẽn-kãnga rãmba. La ka bur kom la b na n yãb ye, ka ko-yũud la b na n yãb ye. Yaa m goama kom la ko-yũud n na n yõk-ba.
Sẽn wẽend-b ne Samari yel-beedã, sẽn yet-ba: «Dã, ad m wẽenda ne fo wẽndã, m wẽenda ne Beerseba tõog la a pãnga,» bãmb fãa na n lʋɩɩme la b kõn le yik ye.