Obadia ni daa nya ʒii shɛli m-bɔŋɔ. Yawɛ ŋun nyɛ ti Duuma ŋɔ ni yɛli shɛm zaŋ chaŋ Ɛdomnim’ polo m-bɔŋɔ. Yawɛ daa tim’ o tumo zuliya shɛb’ sani, ka ti wum o yɛligu maa. O ni daa yɛli shɛm m-bɔŋɔ: “Malimiya shili ka ti chaŋ ti tuhi Ɛdomnima!”
Yi yinsi nyɛla tampima voya ni. Yi karimbaani n-yɔhim ya ka yi me yi yinsi maa tamla zoya zuɣu, ka ŋmaligi yɛli yimaŋa, ‘Ŋuni n-lee ni siɣisi ti tiŋ’ na?’
Tayiɣisi yi ka yi yinsi na bee ŋmɛnditoya yi kana yuŋ, pa bɛ ni bɔri binshɛŋa kɔŋko ka bɛ zura? Ka puri tumtumdib’ yi kana ni bɛ ti kpuɣi yi puri atam, bɛ ku chɛ binyiha bahi? Amaa yi dimnim’ bɛn’ ni kpimsi ya zaa!
Ninvuɣ’ shɛb’ bɛn nyɛ yi zɔnim’ zaa yɔhim ya. Bɛ kari ya tahi yi tiŋgbɔŋ tariga. Yi mini ninvuɣ’ shɛb’ bɛn yi ka taali nyaŋ ya. Yi mini yi zɔnim’ bɛn laɣindi timdi diri bari ya zana, ka yi ku tooi baŋ li.”
Dahin shɛli tinzunnim’ ni daa kana ti ʒi bɛ daazichi chaŋ la, dindali maa yi daa kaɣimi ʒe kpaŋa. Saamba maa ni daa kpe bɛ dunɔdaya ni nti pihi kuɣa sɔŋ ni bɛ lihi nya bɛ ni yɛn piri Jɛrusalɛm nɛma shɛm la, yi gba daa bemi kaman bɛ ni daa be shɛm.
Di daa bi simdi ni yi mali yi mabihi ansarisi bɛ nandahima dabisili dali. Di daa bi simdi ni yi mali suhupiɛlli Judanim’ zuɣu bɛ kpimsibu dabisili dali. Di daa bi simdi ni yi nyu bara n-niŋ ba bɛ wahala dibu dabisili dali.
Di daa bi simdi ni yi kpe n niriba dunɔdaya ni bɛ daashaara nyabu dali. Di daa bi simdi ni yi mali ba ansarisi bɛ wahala dibu mini bɛ daashaara nyabu dali. Ka di mi daa bi simdi ni yi fa bɛ daazichi bɛ daashaara nyabu dali.
Di daa bi simdi ni yi ŋma nti ʒe sochira zuɣu n-gu ni yi gbahi bɛ ni shɛb’ bɛn zɔri ni bɛ tiligi la. Di mi daa bi simdi ni yi gbahi bɛn kpalim ti bɛ dimnima bɛ nandahima dabisili dali.
“Dahin shɛli man’ Yawɛ ni ti yɛn kari zuliya kam zaa saria la miriya. Yi ni nya yi ni daa zaŋ shɛli ti yi tab’ la tatabo. Yi ni daa niŋ shɛm la ni ŋmaligi lu yi zuɣu.
Ka yinim’ bɛn nyɛ n niriba ŋɔ mi ni daa nyu tibidarigibo binnyur’ shɛli zoli din be kasi zuɣu shɛm la, zuliya shɛb’ bɛn gili ya la zaa gba ni nyu li. Bɛ ni nyu li hal ti chani jeena, ka leei bɛn be kaman bɛn kani.
Yaakubu zuliya ni ti ŋmanila buɣim; ka Yisifu zuliya mi ŋmani buɣimniɛm. Iso zuliya ni ti ŋmanila kaɣ’ shɛŋa bɛ ni niŋ buɣim nyo ka di di zaa; ka Iso zuliya maa ni ninvuɣ’ yino gba ku tiligi. Man’ Yawɛ n-yɛli lala maa.
“Ka Nɛgɛbinim’ ti deei Iso Zoli su; ka bɛn be zolɔna ni wulinluhili polo la ti deei Filistia tiŋgbɔŋ su. Ka Izraɛlnim’ ni ti deei Ifriim mini Samaria tiŋgbɔŋ su. Ka Bɛnjamin zuliya mi ti deei Giliad su.
Izraɛlnim’ bɛn yi tindul’ na ni ti tuhi deei Fɔnisia tiŋgbɔŋ n-zaŋ kpa nuzaa polo hal ni Zarɛfat su. Ka Izraɛlnim’ shɛb’ bɛn nyɛ Jɛrusalɛmnim’ ka yi tindul’ na nti be Saadis la mi ti tuhi deei Nɛgɛb tinsi su.