Nga Zonasi wilila ka Tarisisi sira ta, a tun b'a fɛ ka boli k'a yɔrɔ jaɲa Masaba la. A sera Zafa ka kurun dɔ sɔrɔ yen min tun be tagara Tarisisi. A ye taasɔngɔ sara ka don u fɛ kurun kɔnɔ ka Tarisisi sira minɛ waasa a yɔrɔ ka jaɲa Masaba la.
Kurun bolibaga nunu siranna kosɔbɛ, u kelen kelen bɛɛ y'u ka joow wele waasa u k'u dɛmɛ. U ye kurun kɔnɔ minanw fili jii la waasa a ka fiɲɛya. O y'a sɔrɔ Zonasi jigira kurun jukɔrɔ, ka la n'a be sinɔgɔ.
O tuma na, kurun bolilaw ɲamɔgɔ jigira k'a fɔ a ye ko: «Ee! E be sinɔgɔra le wa? Wili k'i ka batofɛn daali. N'a sɔrɔ ale ben'a janto an na k'an kisi saya ma.»
O la, u ye Masaba daali ko: «Ee! Masaba, sabali! Kan'a to cɛɛ nin kosɔn an bɛɛ be sa ɲɔgɔn fɛ! I kana an jalaki ko an ye mɔgɔ faga gwansan, an nɔɔ tɛ. Bari, ele Masaba be min fɛ, e b'o le kɛ.»