Yunus pas adu'a, “Adhu GUSTE, abdidalem gu ta' ampon mator sabellunnepon mangkat dhari compo' gi' dhimen, ja' Junandalem tanto alampa'agi kadi ka'dhinto? Ka'dhinto sabappepon aponapa abdidalem me' terros buru ka Spanyol! Abdidalem oneng jugan ja' Junandalem ka'dhinto Allah se bellas ase, sabbar sareng ta' gampang duka, alos, sareng ros-terrosan asadhiya ngoba'a kasokanna se ngokoma.
Saellana jareya Yunus meyos ka temorra kottha, sarta pas alenggi e jadhiya. Salerana abadhi ranggun sarta ngaop e dhalemmanna, sambi anante' apa se bakal kadaddiyana e kottha Niniwe.
Saellana are moncar, Allah madhateng angen se panas se dhateng dhari temor. Yunus para' kalengngerra ekenneng sonarra are se akantha se ngobbar serana. Salerana arassa potos pangarep, sarta terro seda'a. Dhabuna, “Lebbi becce' sengko' mate bai etembang odhi' kantha reya!”
PANGERAN pas adhabu ka Yunus jareya, “Tamennan reya tombu pera' e dhalem bakto samalem, sarta pas elop kalagguwanna; ba'na ta' noro' namen ban ta' noro' meyara. Maske kantha jareya ba'na arassa sossa polana tamennan jareya elop.
Masa' Sengko' ta' sossa'a mekkere Niniwe, kottha se raja jareya. Sabab salaenna e kottha jareya badha ban-kebanna se ta' kaetong bannya'na, e jadhiya gi' badha na'-kana' lebbi dhari saratos dhu polo ebu oreng, na'-kana' se gi' ta' tao abida'agi apa se becce' ban apa se juba'.”