Ad koɛɛg ninga Soaala-Wẽnd sẽn kõ a Mise, Moresɛt neda, Zɩɩda nanamse a Zotam, a Aaz la a Ezekiyas wakatẽ. Likra pʋgẽ, Samari ne Zerizalɛɛm yɛla la a yãend yã.
B sẽn yi b zĩ-sõngẽ wã ya-la a Zakoob yagensa beegr yĩnga, yaa Israyɛl kamb sẽn bas bãmba yĩnga. Ãnda n tusd a Israyɛl t'a zẽkd a zugu? Yaa a na-tẽngã, yaa Samari. Ãnda n tusd a Zɩɩda a wẽn-naandsa waoogr zĩigẽ, yaa Zerizalɛɛm memga.
Dẽ la Naaba-Wẽnd gomda: M na n kɩtame tɩ Samari lebg raboogo, lalsa na n tusame n lub zãng tɩ m wʋk a kugã n lob sudgẽ la Samari na n lebga wa bugsuntungu pʋʋgo sẽn maneg paalem.
Mam na n sãama a wẽn-naandsã fãa, a laoga na n dɩɩ bugum, ned kõn le yãe b wẽn-naandsa ye. Samari arzɛka yii pʋg-yoaadb nengẽ la bãmb nengẽ la a na n lebe.
Loog-y pa-weere, Safir dãmba, loog-y bɩlgemde la ne yãnde. Sã n ya yãmba, Sãana rãmba, b ra le yãend-y yɩng ye. B yãbda kʋʋre Bɛt-Esɛl tẽnga, soondg zĩig ka kees be ye.