An khumlaizâwla khawlohna suangtuahtute leh thil ṭha lo ngaihtuah chhuaktute chu an chung a pik e! Zîngah khua a lo vârin an tum ang ngei chuan an ti ta rêng a.
Chuvângin, Lalpan heti hian a ti: “Ngai teh, he chhûngkaw chungah hian thil ṭha lo ka suangtuah a ni, chumi aṭang chuan in nghâwng in la sawn lo vang a, chapo takin in kal tawh hek lo vang; hun ṭha lo a ni dâwn si a.
Chumi nîah chuan nangmahni demin tehkhin thu an siam ang a, ṭah hla lungchhiatthlâka chhamin, ‘Rawkin kan awm zo ta a nih hi! Ka mite chan a tidanglam a; ka hnên ata a tisawn ta a nih hi! Hel hmangte hnênah kan lo a sem darh ta a ni,’ an ti ang.”
Aw Jakoba chhûngte u, “ Lalpa thlarau chuan dawhtheihna a tlachham em ni? Hnawh chêpin a awm em ni? Hêng hi a thiltih a ni em, tih tûr em ni? Dik taka awm ṭhîn chungah chuan ka thute hian thil ṭha a ti lo vem ni?
Nimahsela, ka mite chu tlai khawhnuah hmêlma angin an lo ding chhuak a ni: indo duh lova râlmuang taka mi veivâkte chu an silhfên kawrfualte in hlihsak a.
“Aw Jakob-ho, in vaiin ka ko khâwm ngei ang che u a, Israel mi la awm chhunte chu ka hruai khâwm ngei ang; Bozra khaw berâm angin ka dah khâwm ang a, ran rual an hlobet hmuna awm ang maiin; mipui an nih avâng chuan an sa mur mur ang.
Su tlangtu chu an hmaah a kal a; an su tlang a, kawngkhâr thlengin an kal zêl a, chumiah chuan an kal chhuak a ni; tin, an lal chu an hmaah a kal a, Lalpa chuan an hma a hruai a.”