|
| 1 |
|
| Kịpụhagụ nwan ndị-agha ị, nị ndị-iṅẹnrẹn e kehunmẹgụọ ẹnyi: a fịan wẹ onyẹ-ọkịkị Izrẹlụ ẹgbe nti. |
|
| 2 |
|
| Kanị, ịyụ, Bẹt'lẹhẹm Ẹfrata, hụn nwọnlẹni ihiẹn ọ wụ imẹ ebọn ndị rị Juda, imẹ i kẹ onyẹ-ọkịkị a gha pụhanị m, d'a kị ndị Izrẹlụ, Onyẹ hụn rị ẹdẹi, rị kete-kete. |
|
| 3 |
|
| O jẹnkọ nwan d'a lagụ wẹ tọ d'e ru mgbe okpoho hụ imẹ rị e mẹ mụ, umunẹ ẹ họdụnị a lụaburu ndị Izrẹlụ. |
|
| 4 |
|
| O k'a pụha nwan, gi ikẹn Osolobuẹ, ọghọ rị ẹfan Osolobuẹ wụ Chuku ẹ zụn atụnrụn a. Onwọnzini ihiẹn k'e mẹ wẹ, makẹni o k'a wụ okẹn ịhịan elu ụwa ile; |
|
| 5 |
|
| O k'e mẹ udọn rị. Ndị Asiria a banhan alị ẹnyi; ụkụ wẹ ru ụlọ-uku ndị rị alị ẹnyi, ẹnyi e wepụhanị wẹ ndị-ndu ẹsa zu ọnụ, madụ ẹsatọ-dẹ hụn ru ogo. |
|
| 6 |
|
| Wẹ k'e gi ọpịa-agha du alị Asiria, alị Nimrọdụ, d'e rudẹ ọnụ-mgbọn ẹ. Eze ẹnyi hụ lalanị jẹnkọ d'a gbapụha ẹnyi ẹka ndị Asiria, omẹni ndị Asiria a banhan alị ẹnyi mọbụ zọdẹ ụkụ ye ẹ. |
|
| 7 |
|
| Ogẹn hụ, ndị ebọn Jekọpụ k'a họdụnị k'a rị imẹ igunrun alị ndị ọzọ nọkẹ igirigi Osolobuẹ zihẹ; wẹ k'a nọ kẹ mirin zueye irurue hụn ghalẹni e cheri ịhịan, hụn ghalẹni e che ịhịan-mmaka. |
|
| 8 |
|
| Ẹghẹẹ, ebọn Jekọpụ hụn k'a họdụnị, hụn k'a rị imẹ igunrun alị ndị ọzọ bu ọda, k'a rị kẹ ẹwọrọ hụn rị imẹ anụmanụ ndị ọzọ rị ẹgboko; Wẹ k'a rị kẹ nwa-ẹwọrọ rị imẹ igunrun atụnrụn, ọ ghakọnị imẹ igunrun atụnrụn, ọ hụ a zọgbu wẹ, a dọrinrin wẹ, onwọnni onyẹ a saẹka a zụọpụha wẹ ẹka a. |
|
| 9 |
|
| Ẹka ụnụ k'a dụ ndị-iṅẹnrẹn ụnụ, ndị-iṅẹnrẹn ụnụ ile k'a gụchanrịn. |
|
| 10 |
|
| Osolobuẹ sị, “O ru ogẹn ahụn, m jẹnkọ d'e gbuchanrịn ẹshin-agha ụnụ, tikpọ ụgbọ-anyịnyan agha ụnụ; |
|
| 11 |
|
| m k'e tikpọchanrịn obodo ile ụnụ tụnhunmẹ mgbọn lẹ ebe ile ụnụ a gbaban. |
|
| 12 |
|
| M k'a zapụchanrịn ihiẹn ile wẹ gi ikẹn mmọn a rụn; ndị a gba ẹfa arịkọzị imẹ ụnụ. |
|
| 13 |
|
| M k'e tikpọchanrịn mmọn ile ụnụ kọma lẹ osisi ile ụnụ zumẹni mmọn; ụnụ akụkọzịnị ihiẹn ẹka ụnụ mẹmẹ isi alị. |
|
| 14 |
|
| M k'e huepụ osisi ile ụnụ nọ ukun wẹ a rụa Ashẹra; e tikpọchanrịn m obodo ụnụ ile. |
|
| 15 |
|
| M k'e gi iwe lẹ olulu mẹgwarị alị ndị ahụn humẹlẹnini m isi.” |
|
|
|
|