Ala min t’a fɛ mɔgɔ ye ale ni batofɛn wɛrɛ kanu ɲɔgɔn fɛ, ani Ala min bɛ kojugu juru sara, o le ye Matigi Ala ye. Matigi Ala bɛ hakɛ sara; a ta dimi ka jugu kosɛbɛ. A bɛ a kɛrɛbagaw ta kojuguw sara, a bɛ a ta dimi mara a juguw kama.
Matigi Ala tɛ dimi joona, a ta sebagaya ka bon; a fana tɛ kojugukɛbaga to ni a ma a ta kojugu hakɛ bɔ a ra. Matigi Ala bɛ a tɛmɛsira bɔ folonkonto ni sanfɔɲɔ cɛ ma; sankabaw ye a sennabuguri le ye.
Matigi Ala ko: «Hali ni Asirikaw ka ca, hali ni o baraka ka bon cogo o cogo, o bɛna tigɛ ka ben le! O bɛɛ bɛna ban pewu. Aw Zuda mɔgɔw, ne ka aw tɔɔrɔ, nka ne tɛna aw tɔɔrɔ tuun.
Matigi Ala ka kuma min fɔ ele Ninive dugu kama, o le ye nin ye: A ko: «Aw tɛna duruja sɔrɔ aw tɔgɔ bɛ la min na. Aw ta jo kabakururamanw, ani aw ka nɛgɛ yeele k’a kɛ batofɛn minw ye, ne bɛna o bɛɛ sama ka bɔ aw ta alaw ta sɔnnikɛbonw kɔnɔ. Ne bɛna aw ta kaburu labɛn k’a bla, sabu aw tɛ foyi ye.»