|
| 1 |
|
| Nennewe! Kade gashshanno diini dayinohe. Kunnira, qiishokki kaajjishi'ri, doogokki seekkite agadhi; hallokki qodhi. Wolqakki baala kaajjishidhe olaho qixxaawi. |
|
| 2 |
|
| Diinna mulqitunsarono, woyinete kaashshonsa baalanka hunturono; Kaaliiqi Israeelete ayirrinye bashshowa qolanno. |
|
| 3 |
|
| Diinu gaaddo duummaadda wonquwa amaxxitino; duummaadda uddannano uddidhino. Gaadunniti faradu gaarensano, giirate buwani gede wala wala yitanno. Faradinsa hookkisanno; urdensannino hemmeeqidhanno; kunni garinni olaho qixxaabbanno. |
|
| 4 |
|
| Faradi gaarensano doogga baalate lowo geeshsha rakke doddanno. Kawanna ka'a lowo geeshsha buubbanni katamu gudumaalla doyitanno. Wala wala yaanno caabbicho labbanno, banqote gede beleqqanno. |
|
| 5 |
|
| Olu hajajaano baalanti woshshante gamba yitanno. Ikkollana dirante hadhanno woyite gufidhanno. Diinu gaaddo doddanni dagge, katamu huxxa dhoosse e'ara qixxaabbino. |
|
| 6 |
|
| Xashshu ragaanni nooti katamu huxxi waalchuwa, macaqqi yite fa'nantu. Gashshootu mini mannino hembeelami. |
|
| 7 |
|
| Mootitteno qafadantu, seennu soqqamaanose gagaso ga'nanni, bukukkaama gede ikke wi'li. |
|
| 8 |
|
| Kofame dhoonseenna co'o yee fule goofanno wayi gede, Nennewe mannino katamu giddonni mucuqqi yee fulanno. «Xooqqinoonte!» yine woshshininsaro nafa, ayino badhera dihiganno. |
|
| 9 |
|
| Katamu jiro kiirre didandiinannite; kunnira, hadhine birranna culka saantine adhe. |
|
| 10 |
|
| Nennewe Katami co'o yee bai; diigame ona ikke gati. Mannu baalunku wodani waajjillunni kainohunni daaqi. Guluchu baalunku qece yii; mannu baalunku halli leqe yii; baalunku albi xawulushshi yii. |
|
| 11 |
|
| Doobbiyu hosannowa, doobbiyu ooso heedhannowa; labballunna meentu doobbiyi, qaaqquullinsa ledo yaaddo nookkiha galanno ga'rimmo lawannohu; hakku katami hanni xa hiikko nooyya? |
|
| 12 |
|
| Doobbiichu ugaaxe abbe, oososiranna ledosi heedhannotera meya doobbiichora ikkannonsa geeshshire shiqishannonsa. Godinsara ugaaxe abbino maala wonshanno. |
|
| 13 |
|
| Olantote Mootichi Kaaliiqi, «Kuneeti ani diinoomunni kaoommohe. Faradi gaarekkino giireemmo; doobbiichu gede waajjishshannota gaaddokki bisetenni gudeemmo. Wolu manniwiinni mulqidhe gamba assi'roottaha baala huneemmo; kunni ka'a ate daafira coyidhannorita, soqqamaanokki huuro horontanni dimacciishshinanni» yaanno. |
|
|
|
|