Ndi uri nzumbululo iyi ndi vhuṱanzi ha tshifhinga tsho vhewaho. I amba zwa vhufhelo, zwine ya amba zwi ḓo wanala zwi ngoho. Naho ya lenga, u i lindele; vhukuma i ḓo ḓa, a i nga lengi.
“Vhukuma muthu wa u ḓihudza a sa pfeleli u ḓo fhurwa nga lupfumo. U na tseḓa i no nga ya tshalo, u nga lufu, ha fushei u ḓikuvhanganyela tshakha dzoṱhe, vhathu vhoṱhe u vha ita mathubwa.
Zwenezwo vha ḓo mu goḓa vhoṱhe, vha mu kolela vha mu holedza vha ri, ‘U ḓo zwi vhona hoyu ane a khokha thundu ye a tswa, a pfuma nga u lifhisa vhathu milandu! Zwi ḓo guma zwenezwino!’
Ndi uri wo ṱangula tshakha nnzhi, ndi zwone, vhathu vho salaho vha ḓo ṱangula iwe; ngauri wo shulula malofha a vhathu, wa phusukanya mashango na miḓi wa lozwa vhoṱhe vha dzulaho hone.
“Khombo i ḓo u wela, ngauri wo ḓipfumisa nga thundu ye wa i wana nga vhuvemu, wa fhaṱa tshiṱaha tshau nṱha uri u tinye tshanḓa tshi ḓisaho khombo! Thundu yeneyo i ḓo ḓisela muṱa wau khombo.
Kani-ha zwe vhathu vha shuma zwi tshi fhedza nga u swa nga mulilo, zwe tshakha dza ḓinetisela, zwa sala zwi si tshithu, a si Muṋe washu Mulangazwoṱhe we a ri kha zwi ralo naa?
A u tsha ḓo vha na vhugala, tshau dzi ḓo vha ṱhoni. Zwino ndi tshifhinga tshau! Inwa u pepeleke! Tshinwelo tshi no bva tshanḓani tsha maanḓa tsha Yahavee tshi ḓo mona tsha vhuya tsha swika ha iwe, vhugala hau vhu vho ḓo tibwa nga ṱhoni.
Wo rema miri ya Libanoni, zwino hu ḓo reṅwa iwe, wo vhulaha dziphukha, zwino dzi vho ḓo u pandamedza. Wo shulula malofha a vhathu, wo phusukanya mashango na miḓi, wa lozwa vhoṱhe vha dzulaho henefho.
“Mudzimu wa tshitungulo u na mushumo-ḓe? Hufha wo vhaḓwa nga muthu! Ndi tshifanyiso, tshi gudisa vhathu vhufhura fhedzi. Muthu zwi mu farisani a tshi fulufhela tshithu tshe a vhaḓa nga zwanḓa zwawe? Hufha o ita mudzimu u sa tshidzi, na u amba u sa ambi?
Khombo i ḓo wela muthu ane a vhudza tshitanda a ri, ‘Vuwa!’ Kana a vhudza tombo ḽi sa ambi a ri, ‘Takuwa!’ Ḽi nga u dzumbululela mini? Naho ḽo fhomiwa nga musuku na siliva, a ḽi nga vhuyi ḽa fema.