Soaala, Soaala, m wʋma y noora sẽn togsã, la rabeem bal n tar-ma, Soaala paam pẽgr yʋʋma sẽn tong taabã y tʋʋm sõma wã y sẽn tʋma yĩnga! Yʋʋma sẽn watã le berg-y y tʋʋm bãna tõnd ninsaalba nifẽ. Ba y sã n be bʋʋm n yikd y sũur ne-do, baasgo wilg-y tõnd y nimbãan-zoeere.
B yalsa b nao zugu la tẽnga la b magyã. B gesa Adem biisi tɩ b sɩng rigbu. Tẽn-kʋdem wẽnnẽ tãmsa vigsdame, tɩ tãn-bi wã kell n sut zãnga. Yaa so-kʋda la b le rɩke.
Soaala, yaa ne kʋɩlsã la yãmb sũura fõt bɩ? Yaa ne mogrã, la yãmb sũur puug bi? Yaa y sũurã n puugi tɩ y zomb sawatã wa wiidi, n zomb-b wa b soga bilim-bilm, tɩ y na n zab y raood zabre bɩ?
Yãmb deesda bɛɛba zab-teedo n wẽneg n wurd b zutu. B ra fõt n kẽeda maam wa sɩlmande, b ra wat n na n yaam-m lame wala sẽn maand ne b sẽn tõog a soab fãa.
Mam wʋma rãamdã tɩ rabeem yõk-ma bʋʋra kɩtame tɩ m no-gãnda rigda; zũnzũur n kẽ m kõabã, tɩ kam-wers sẽb m gĩina. Daara la m da yɛs sɩɩ n gũudẽ, m gũuda bɛɛba zu-beeda raare, n na bob zabre n fãag m menga.
M sẽn ne nanda, m neeme tɩ kankang ka ningd puud ye, bugsuntund ka womd biis ye. Oliviye rãmb dõosg ka yõod ye, pʋt ka rɩlgd a koaad ye, wubr ka le tar pesg ye, nag-gãagẽ nag-bil meng ka ye.
M Soaala yaa m Wẽnd la m pãnga. B kɩtame tɩ m karse lebg wala yĩsr rẽnna, la tãmsa zut la lolemd marsã. Yɩɩla naab yɩɩndame tɩ kʋnde, ruudg la bɛɛl wẽedẽ.