m k'e tikpọchanrịn ịhịan lẹ anụmanụ; m k'e tikpọchanrịn nnụnụ e feni lẹ azụn rị imẹ ohimin lẹ ihiẹn ndị hụ ndị njọ gi rị a kpọgburu. M k'a zapụchanrịn ịhịan elu ụwa. Ya kẹ mmẹ wụ Osolobuẹ ku.
M k'a tịnpụ ẹka mẹ alị Juda ihiẹn, ịya lẹ ndị ile bi isi-alị wẹ wụ Jerusalẹm. M sikọ d'a zapụchanrịn mmọn Baalụ lẹ ihiẹn ile gbashịarịn'a ebeni, a zapụ m ndị ihẹnrẹn-mmọn Baalụ, anyanhankọzị wẹ wẹ!
Gba nị nwan nkịtịn ihun Osolobuẹ-nwọnni-ẹnyi, nị ogẹn okinkin-ikpe Osolobuẹ a rịgụọ nsue! Osolobuẹ a kwademẹgụọ n'o mẹ ndị alị Juda ihiẹn w'e mẹ anụ wẹ gi chụn ẹjan; Ọ họtọgụọ ndị o wela d'e ri ndị Juda kẹ w'e ri anụ.
Osolobuẹ sị, “O ru ogẹn ahụn, m k'e mẹshi wẹ ikẹn ndị ile e ṅọnghafe ụzọ kẹ ndị a rụa mmọn, lẹ ndị a tụnarịn, a zụọnarịn ndị ọzọ ihiẹn wẹ, e kpọnjun ụlọ onyẹ wẹ rị e fe.”
“Eje-ogẹn hụ Osolobuẹ k'e gi ye afụnfụn a rịgụọ nsue! Ọ rịgụọkwọ nsue; ọ lala ẹgwa! Wẹ k'a kwan eje ẹkwan ogẹn hụ! Nke wụnị ndị-agha k'a ghadẹ a kwan ụya imẹ ọgbọ-agha.
Egho wẹ lẹ ihiẹn ile wẹ nwọn azụọpụhakọ wẹ ogẹn hụ Osolobuẹ k'e gi ghọsị iwe-lẹ-ọnụma a. O k'e gi iwe-lẹ-ọnụma bu elu-ụwa ile ri kẹ ọkụn dọn e bu ihiẹn e ri.”