Woto yaa koees niyns a Sofoni sẽn paam Soaala nengẽ a Amon biiga a Zoziyas sẽn waa n ya Zɩɩda dĩma. A Sofoni, yaa a Kusi biiga, t'a Kusi yaa a Gedaliya biiga, a Amariya yagenga, a Ezekiyas yagen-tʋbra-kẽega.
M na n zẽka m nugu n zab ne Zerizalɛɛm kẽedba fãa, ne Zɩɩda neba fãa. M na n yiisa Zɩɩda tẽn-peelmẽ bũmb ning fãa sẽn ket n wẽnd a Baal waoogre. M kõn le sak tɩ b tẽeg a maan-kʋʋdba meng yell ye.
M na n zaba ne sẽn dʋʋd-b rot zutu n waoogd yĩngr ãdsã, n zab ne sẽn ka yɛs-b zĩ-yɛnga. Bãmb dãmb n wẽende tɩ yaa maam, Naaba-Wẽnd, la b pʋgda la b naag n pʋgd wẽn-naand a Milkom.
Maam n le yete, maam, Naaba-Wẽnde, tɩ m maoonga raare, Zerizalɛɛm dãmb na wʋm kɛleng, Zĩma rignoorẽ. Kũmkũm na sãd Kẽedpaalgo la tãmsa na wulumd ne bʋ-raase.
Baraare m na n widga fitila, m na n vɛɛsa Zerizalɛɛm m na n zaba ne neb niyns sẽn gãe ne bãane, wala rãam sẽn dɩgle t'a rabɩlla tisgi, la b yet b sũurẽ: Soaala pa tõe fɩ, b pa tõe wẽng bɩ neer ye!
M na n kɩtame tɩ yel-beed paam nebã la b na n kẽna wala zoeense tɩ b beega, Soaala-Wẽnnaam. B zɩɩma na n daaga zĩig zãnga wala toma sẽn yɛdg tẽngã, tɩ sẽn ki-ba lob wala sagdo, tɩ b be be n põogdẽ.
Soaala sũ-puura raare ka wanzurf bɩ sãnem n tõe n le fãag ned ye. Tẽnga fãa na n dɩɩ bugum, b sũ-fõora bugum, tɩ bala b na n waa ne yel-beedo, b na n menesa tẽnga kẽedba fãa gilli.