Mẹ n'ẹ Osolobuẹ gini d'e mẹ ụnụ ihiẹn o ku; amamgbe ogẹn ụnụ e gi wanahịn a ghafe kẹ ẹfịfịa ufere bupụ; amamgbe olulu Osolobuẹ nọ kẹ ọkụn e kunrun ụnụ, amamgbe ogẹn ahụn Osolobuẹ e gi ghọsị eje-olulu ẹ e kunrun ụnụ!
Mẹsọnmẹ ni uche Osolobuẹ ụnụ ile hụn e welụa enwẹn wẹ alị, ụnụ ile hụn e mẹ ihiẹn Osolobuẹ ku; e mẹni uche ẹ, ewelụabehikwọlẹ ni enwẹn ụnụ alị; ikẹnkwọ Osolobuẹ a nị ụnụ wanahịn ogẹn hụ o k'a ghọsị iwe-lẹ-ọnụma a.
Obodo Gaza k'a gba okpokoro; obodo Ash'kẹlọnụ k'a gbazịkwọ okpokoro; wẹ k'a chụpụchanrịn ndị obodo Ash'dọdụ, ẹnyanwụn gini d'a kpọfe isi; wẹ k'e huepụ ndị obodo Ẹkrọnụ.
Ẹgbẹrẹ ohiminni ile k'a wụrụ nke ndị Juda k'a họdụnị, a nọ w'a a zụn atụnrụn, ọhịhị gba, a ranhịn wẹ ụlọ ndị Ash'kẹlọnụ te bi. O k'a rị ẹrịra, makẹni Osolobuẹ wụ Chuku ndị Juda k'a tụnị wẹ ụya, mẹ n'ọ rịzịnị wẹ mma.
Igunrun efin lẹ atụnrụn k'a rị a kpahunmẹ imẹ ẹ; anụ ọfịa ile rị ichẹn-ichẹn k'a rị a; ozuzu k'a gha a ranhịn elu adansụn hụn rị mkpọkọ-ụlọ rị ebẹhụ; a ghasọnmẹ windo ụlọ ndị hụ e woo; Mkpọkọ ihiẹn k'e jun ọnụmụzọ rị ebẹhụ; osisi Sida wẹ te gi ma ụsụọ-ẹjan arịkọzị a.
Ọnwan wụ obodo Ninivẹ nwẹn te rị a ṅannị, hụn nwọnlẹni ihiẹn ọ tụ egun ẹ! Ninivẹ hụn e te sị enwẹn ẹ, “Mmẹ rọ! Onwọnni onyẹ han kẹ mmẹ!” Lee k'o gba nwan okpokoro! O họnringụọ nwan ebe anụ ọfịa e bi! Onyẹ pụha ebe Ninivẹ te rị, ọ ma ọsụọ, o be ọrịọ.