नियुक्त गरिएको समय आउन अघि नै, र भुसजस्तै त्यो दिन बितेर जान अघि, परमप्रभुको भयङ्कर रीस तिमीहरूमाथि आउन अघि, र परमप्रभुका क्रोधको दिन तिमीहरूमाथि आउन अघि नै।
हे देशका दीन हो, तिमीहरू, जो उहाँको आज्ञापालन गर्छौ, परमप्रभुको खोजी गर। धार्मिकता खोज, नम्रता खोज, र परमप्रभुका रीसको दिनमा शायद तिमीहरूले शरण पाउनेछौ।
समुद्रको किनारमा रहने करेती जातिलाई धिक्कार! परमप्रभुको वचन तिमीहरूका विरुद्धमा छ, हे कनान, पलिश्तीहरूको देश। “तँमा कुनै बासिन्दा नरहने गरी म तँलाई नाश गर्नेछु।”
यसैकारण सर्वशक्तिमान् परमप्रभु, इस्राएलका परमेश्वर भन्नुहुन्छ, “म जीवित रहेझैँ, निश्चय नै मोआब सदोमजस्तै र अम्मोनीहरू गमोराजस्तै झार-जङ्गल र नूनका खाल्डा भएको ठाउँ, र सदासर्वदाको निम्ति रूखो जमिन हुनेछन्। मेरो प्रजाका बाँकी रहेका मानिसहरूले तिनीहरूलाई लुट्नेछन्, र मेरो प्रजाका बचेकाहरूले तिनीहरूको देश अधिकार गर्नेछन्।”
जब उहाँले देशका सबै देवताहरूलाई नष्ट पार्नुहुनेछ, तब तिनीहरूका निम्ति परमप्रभु भयङ्कर हुनुहुनेछ। हरेक किनारका जाति-जातिले उहाँको आराधना गर्नेछन्, प्रत्येकले आफ्नै भूमिमा।
उहाँले उत्तर दिशाको विरुद्धमा आफ्नो हात पसारेर अश्शूरलाई सर्वनाश गर्नुहुनेछ। उहाँले निनवेलाई पूर्ण रूपमा उजाड़ र मरुभूमिजस्तो सुक्खा तुल्याउनुहुनेछ।
यो त त्यही सुरक्षितसाथ निर्धक्क बस्ने सहर हो, जसले आफ्नो हृदयमा भन्दथ्यो, “म नै हुँ, मबाहेक अरू कोही छैन।” त्यो कस्तो भग्नावशेष भयो, वन-पशुहरूको ओड़ार। त्यताबाट भएर जानेहरू सबैले त्यसको गिल्ला गर्दै मुक्का देखाउँछन्।