मुला परमेस्सर अबहुँ भी उ सहर मँ बाटइ अउ उ ओनके बरे लगातर निआव स भरा रहा ह। परमेस्सर कछू भी बुरा नाहीं करत। उ अपने लोगन क भलाइ करता चला आवत ह। लगातार हर भिंसारे उ आपन लोगन क संग निआव करत ह। मुला बुरे लोग आपन कीन्ह भए बुरे करमन बरे लज्जित नाहीं होतेन।
मइँ तू पचन्स इ एह बरे कहत हउँ ताकि तू पचे सिच्छा ल्या। अगर तू पचे अइसा करब्या तउ तोहार पचन क घर नस्ट नाहीं होइ। अगर तू पचे अइसा करब्या तउ मइँ आपन बनाई भइ योजना क अनुसार तू पचन क सजा नाहीं देबउँ।” मुला उ पचे बुरे लोग वइसेन ही बुरे करमन अउर जियादा करइ चाहत हीं जेनका उ पचे पहिले ही कइ रखे अहइँ।
“यरूसलेम, तब तू अगवा चलिके ओन बुरे करमन बरे लजाब होइ बंद कइ देब्या। काहेकि मइँ यरूसलेम स ओन सबहिं बुरे लोगन क निकारिके बाहेर करब। मइँ ओन सबहिं घमण्डी लोगन क दूर कइ देबउँ। ओन घमण्डी लोगन मँ स कउनो भी मोरे पवित्तर पर्वते पइ नाहीं रही पाइ।
तू पचन क परमेस्सर यहोवा तू पचन क संग अहइ। उ सक्तीसाली फउजी क नाई अहइ। उ तू पचन क रच्छा करी। उ देखाई कि उ तू पचन स केतना पियार करत ह। उ देखाई कि उ तू पचन स केतना प्रसन्न अहइ। उ हँसी अउर तू पचन क बारे मँ अइसे खुस होइ।
उ समइ, मइँ तू पचन्क वापस लिआउब। मइँ तू पचन्क एक साथ वापस लिआउब। मइँ तू पचन्क प्रसिद्ध बनाउब। सब जगह लोग तू पचन्क तारीफ करिहीं। इ तब होइ जब मइँ तू पचन्क अँखियन क समन्वा तू सबइ बन्दी लोगन्क लिआउब।” यहोवा इ सबइ कहेस।