Ebinyasae bire ase chinyomba nigo bigokwana amang’ana are bosa, na amaroro ’abaringoria nay’oborimo. Abaroti chindoto nigo bagokwana chindoto chi’obong’ainereria, na baremia abande ase okoremia kwa bosa. Ase engencho eyio abanto nigo bagotayaya buna riicho rie ching’ondi, bachandegete, ekiagera tibabwati omorisia.
Barabwo mbabe buna chituoni chi’esegi, batiringere ababisa babo inse buna eubi ere ase chinchera. Mbarwane, ekiagera inche Omonene nigo inde amo nabarabwo, basookie abariini be chibarasi.”
Abanto ba Efraimu mbabe buna chituoni chi’esegi, bagoke ase chinkoro chiabo buna abanyure edivai. Abana babo mbarore ayio, bagoke, mbagokere Omonene ase chinkoro chiabo ime.
Nimbairanie inka korwa ase ense ya Misiri, nimbasangererie korwa ase ense y’Asuri; mbabeke ase ense ya Gileadi na ase Lebanoni, mbaichore aroro goika baborwe aase bakomenya.
Ekero baraete ase egati y’enyancha y’emechando, inche Omonene ning’ake emerindo yaye, ne chindiba chionsi chi’orooche rwa Naili nchikame; na igo oboenenu bw’Abaasuri mbotiringerwe inse, na enyimbo y’obogambi ya Misiri nesirigwe.