Ya kẹ m nọ dumẹni ndị afịa atụnrụn atụnrụn wẹ jẹnkọ d'e gbu, atụnrụn nwọnlẹni onyẹ wẹ rị mkpa. M nọ weri ọkpọ ẹbụọ m gi a kị wẹ: a kpọ m ohu “Ẹfọma”, kpọ hụn-ẹbọ “Ịrị-ohu”. M nọ dumẹ atụnrụn ndị ahụn.
M nọ nwan sị wẹ, “Omẹni ọ hụghọ mma ẹnya ụnụ, kụ nị m ụgwọ ọrụn m; kanị, omẹni ọ rịnị mma ẹnya ụnụ, ụnụ a gharị.” Ya wẹ nọ ye m egho-ọrụn m, akpụrụ siliva iri kwasị ọgụn mmakalaka!
Ya Osolobuẹ nọ sị m, “Tụ egho ahụn ye ebe w'e dọnmẹ ihiẹn imẹ Ụlọ-nsọ,” egho nwẹn wẹ sị o higbu enwẹn ẹ wẹ sị wẹ k'e ṅọn m! Ya m nọ weri egho hụ, akpụrụ siliva iri kwasị ọgụn hụ, tụ a ye ebe wẹ e butọ ihiẹn imẹ Ụlọ Osolobuẹ.
Makẹni, m rị nwan e wepụhanị alịnị onyẹ-ndu ọzọ, hụn nwọnlẹni ihiẹn ọ kpọ atụnrụn ndị rị a ẹka: kẹ wẹ rị a nwụn anwụn-o, ẹlẹ o k'a chọ n'ọ marịn; ẹlẹ o k'a chọ ndị kpahukọnị; ọ zụọkọ ndị rụ ẹhụ; o yekọ ndị rị ikẹn ihiẹn-oriri, kama, o bu ndị tutuni e ri, ọ fịọpụdẹ wẹ akpụkụ.
O k'a jọ eje onyẹ-ndu atụnrụn hụ njọ, onyẹ hụn a la igunrun atụnrụn a tọ! Ọpịa-agha ya bepụ a ẹka, gụpụ a ẹnya ẹka-nni! Ẹka ya lịlọhịchanrịn a; ẹnya ẹka-nni ẹ ya kpuchanrịn ishi!