Kɛ ɣöö ɣän bä döör diaal jak kä makɛ Jɛ-ru-tha-lɛm kɛ ko̱r, kä ba wec käp, kä ba thol, kä ba man ka̱n kɛ buɔ̱m. Kä ba tha̱a̱ŋ ji̱ wec naŋ ala pɛ̈ɛ̈c, kä bi duɔth tin kɔ̱ŋ duɔth wi̱c.
Kä ɛn cäŋ ɛ mɔ bɛ cuɔ̱ŋ wi̱i̱ pa̱a̱m Ɔ-lip min lot ni Jɛ-ru-tha-lɛm kui̱ känyä ca̱ŋ. Kä bi päm Ɔ-lip rɔ da̱a̱k kä rɛɛw a känɛ jɛ ni kui̱c känyä ca̱ŋ a wä ni kui̱ konyä ca̱ŋ kɛ lo̱o̱l mi di̱i̱t. Kä cu kui̱ kɛl wä kui̱c caam kä cu min dɔ̱ŋ wä kui̱c cuëëc.
Kä bi wi̱c muɔ̱ɔ̱n a day a känɛ jɛ nikä Gabä kui̱c caam a wä nikä Ri-mon kui̱c cuëëc Jɛ-ru-tha-lɛm. Duundɛ ɣöö cu Jɛ-ru-tha-lɛm te ni guäthdɛ a känɛ jɛ ni thi̱ek Ben-ya-min a wä thi̱ek ëë wal a wä ni thi̱ek gɔŋtɔtdä, kä a lɛnɛ ka̱n ni biikä Ɣä-nan-el a wä ni guäth dhi̱mä kɔaŋ kua̱r.
Kä nɛmɛ ɛ jɛn juey in bi Kuoth Nhial ɛ nöŋ nɛy tin bi ben nyiëëny kɛ ji̱ Jɛ-ru-tha-lɛm. Bi ri̱ŋdiɛn rɔ ŋääŋ kä piny kä tekɛ cuŋä, kä bi wäŋkiɛn ɣo̱w, kä bi lëëpkiɛn rɔ cun thuknikiɛn.
Kä nɛy diaal tɔ̱ bi tëk tɔ̱ kä döör diaal tin ci ben nyiëëny kɛ ji̱ Jɛ-ru-tha-lɛm tɔ̱, run kä run bɛ Kuäär ni Kuoth Nhial in la Ruey Ɣɔaa ben a palɛ, kä ba ŋar ti̱mä luaak Kuɔth a ŋarkɛ.
Kä cuɔ̱ɔ̱k kä Jɛ-ru-tha-lɛm kɛnɛ Juda bakɛ lëy Kuoth Nhial in la Ruey Ɣɔaa, kä bi nɛy diaal tin thöpkɛ muc rɔ̱ moc thi̱n kɛ ti thalkɛ ni ri̱ŋ. Kä ɛn cäŋ ɛmɔ bɛ thil nɛy ti kɔakɛ ŋɔak rɛy luaak Kuɔth Nhial in la Ruey Ɣɔaa.