×

Quiché Bible 1995

Zacarías 2

1
Xinwil chi c'u na jun c'utwächinic. Xc'utun jun winak chnuwäch ri ruc'am jun etabal pa u k'ab.
2
Xinc'ot u chi': “¿Jawije' ri catbe wi?” Ri are' xutztelej u bixic chwe: “Quenwetaj na ri tinimit Jerusalen, che retamaxic ri u rabic xukuje' ri u wäch.”
3
Xinwil c'ut chi benam cuban ri tako'n aj caj ri tzijoninak can wuc', jun chi c'u tako'n xel ulok che u c'ulaxic
4
je c'u xubij wa' che: “Chatxiq'uin che u bixic che ri c'ojol ala ri ruc'am bic ri etabal c'am: ‘Ri Jerusalen quec'oji' chi na winak chupam xukuje' tak awaj man cuya' ta chi c'ut quec'oji' ta chi na nimak tak u tapia.
5
Are' c'u ri Ajawaxel cajiquiban u bixic: In quinux na jacha' ta ne jun nimalaj tapia re k'ak' ri cusutij rij ri Jerusalen, pa u niq'uiajil c'ut ri tinimit quinc'ut wi na ri nu juluwem.’ ”
6
Ri Ajawaxel cujiquiba' u bixic: “In xinbanowic chi ri ix xixjabux pa conojel tak c'olbal. Are c'u ri camic quinbij chiwe: ¡Chixanimaj chanim chiya' can ri ulew aj riquiak'ab elebal k'ij! ¡Chito'tajisaj iwib chiwesaj iwib pa u k'ab ri Babilon, ri xixjekebax wi aretak xixc'am ulok, ri ix jekel can pa Sion! In, ri Ajawaxel, quinjiquiba' u bixic.”
7
8
Ri Ajawaxel ri c'o ronojel u cuinem in u takom che u ya'ic we tzijol ri' che u banic c'ax chque ri nimak tak tinimit ri xixquitoloba'. “Apachin ta ne ri cänakow ri nu tinimit cunak ri u c'u'x ri e nu bak'wäch. Rumal ri' kas in quintij na nu chuk'ab chquij tak we nimak tak tinimit ri', quinban c'u na chi kas e are' ri e qui lok'om pataninelab quetolobanic.” Je wa' cuban na ri Ajawaxel ri c'o ronojel u cuinem che u c'utic ri u juluwem, je c'u ri' qui ch'ob na ix chi are' xintakow ulok.
9
10
Ri Ajawaxel cujiquiba' u bixic: “¡Chixbixonok rumal ri quicotemal, winak re Jerusalen, rumal rech chi quinpetic quinel jekel chixo'l!”
11
Aretak chec'ulmataj wa', e q'ui tak ri nimak tak tinimit ri caquijunaj na quib ruc' ri Ajawaxel. Ri are' cubij na: “Xukuje' we nimak tak tinimit ri' quebux na nu tinimit. Quinjeki' c'u na ri in chixo'l ix.” Je c'u ri' ri ix quich'ob na ix chi are' ri Ajawaxel ri c'o ronojel u cuinem are' in takowinak ulok.
12
Ri Ajawaxel cubana chi rech che ri Juda ri rech can nabe ri sibalaj nim u k'ij pa ri tastalicalaj ulew, xukuje' cuya' chi na c'ac' u tzijol ri Jerusalen jacha' u tinimit ri cha'talic.
13
¡Chi ronojel ri uwächulew chi yinil chuwäch ri Ajawaxel, cäpe c'ut ri are' kuc' quel ulok kas chupam ri tastalic c'olbal jawije' ri jekel wi!
Kiche Bible 1995
Biblia Quiché Sociedades Bíblicas Unidas, 1995
:
Guardar notas