×

Bibilia Ilagano Lya Kale 2019

Zakalia 2

1
Kūlola hangī ī gīkī, nūbona munhū ū kū būtongi bone; ū mu nkono gwakwe walī adimīīlile lūgoye lwa kūpimīla!
2
Nūmūja, “Ūlīja halī?” Ūnishokeja, “Nalīja kūgūpima ū nzengo gwa Yelusalemu, nagūbone ūmo gūlī ū būgalī galī nū būlīhu waago.”
3
Ū malaika ūyo waniwīlaga mihayo wīnga; ūnileka, kwimanīla wiza malaika ūngī alīmanhya nang'hwe.
4
Ūshika ūng'wīla, “Peelaga ūkang'wīle ū nsūmba ng'wenūyo gīkī, ‘Ū nzengo gwa Yelusalemu gūtūbiza na ndugu hangī, kūlwa nguno ya wingī wa banhū, nī mitugo ījo jikūbiza moi.
5
Nene ng'wenekīlī nakūbiza ndugu ya moto ya kūgūpīndya,’ alīhaya SEEBA, ‘hama nakūbiza ikūjo lyaago.’
6
“Bing'we! Bing'we! Peelagi ng'wīnge ū kū sī ya sukuma.” Alīhaya SEEBA, “Nguno ū nene hū namusalang'hanya hose pye ū mu masī ayo galī ha sīlīlī y'igūlū,” alīhaya SEEBA.
7
“Bebe Sayuni, Peelaga! Bebe ūyo ūkwikalaga Babuloni, ipījage!”
8
Nguno ū SEEBA wa Būdūla bose ūyo waninhile ikūjo ūnitūma kūja kū mahanga ayo gaalī gaamutaaja sabo jing'we, alīhaya gīkī, “Ūyo ūmukuumya a bing'we wakuumyaga mboni ya liso lyane.
9
Ū nene nakūbanungīja nkono, a basese babo kūbataaja ī sabo jabo. A henaho hū mukūdeeba gīkī ū SEEBA wa Būdūla bose hū ng'wene wanitūmile.
10
“Bebe Sayuni, tūlaga lūpūndū ūyege. Nguno nakwiza, nize nikale hamò ning'we.” Alīhaya SEEBA.
11
“Banhū ba mahanga mingī bakwisangīja kūlī SEEBA ū mu lūshikū lwenūlo, nabo bakūbiza banhū bane. Nakwikala hamò ning'we, hūna mukūdeeba gīkī ū SEEBA wa Būdūla bose wanitūmile ū kū bing'we.
12
Ī Yuda, īyo īlī ngabo gwakwe ū mu sī neela, īkūbiza wingīji bo ng'wa SEEBA, hūna akwīsola hangī ī Yelusalemu.
13
Bing'we banhū bose lembeelagi ū kū būtongi bo ng'wa SEEBA, nguno izile kūfuma ū kū wikalo bokwe wela.”
Sukuma Bible 2019
Sukuma Bible Society of Tanzania, 2019
:
Save Notes