×

Ika Bible 2018

Zẹkaraya 7

1
Hụn mẹ ẹ ahụa ẹnọ eze-kanị wụ Dariọsụ kịma, nke akpọhịn ẹnọ imẹ ifọn nke itenẹi wụ Kislẹvụ, Osolobuẹ gwa mmẹ wụ Zẹkaraya oku.
2
Ndị Bẹtẹlụ zihẹ Sharẹza lẹ Rẹgẹm-mẹlẹki lẹ ndị nke wẹ d'a jụ Osolobuẹ uche ẹ,
3
wẹ jụ ndị nchụn-ẹjan rị Ụlọ-nsọ Osolobuẹ ihiẹn ile rị okpuru ẹ lẹ ndị-amụma ajụjụ, sị, “Nị ẹnyi a kwan, e bu ọnụ ifọn nke isẹn kẹ ẹnyi dọn e mẹ kete ahụa ole-lẹ-ole yeni otikpọ wẹ tikpọ Jerusalẹm?”
4
Ogẹn hụ kẹ Osolobuẹ ihiẹn ile rị okpuru ẹ gi gwa m oku hụ, sị m:
5
“Sị ndị alị Juda ile lẹ ndị nchụn-ẹjan nị m sị: ‘Ogẹn hụ ụnụ gi rị e bu ọnụ hụ, a kwan ẹkwan ifọn nke isẹn lẹ nke ẹsa, ọrọgbọ ahụa iri-kwasị ọgụn-ẹtọnị, mmẹ kẹ ụnụ bun'ẹ?
6
Ogẹn ụnụ gi e ri, a ra, ẹlẹ ẹfọ ụnụ kẹ ụnụ e riye ẹ? Ẹlẹ ẹfọ ụnụ kẹ ụnụ a raye ẹ?
7
“ ‘Ẹlẹ okuni wẹ rị a gwa ụnụ kẹ Osolobuẹ gi ndị-amụma mbụ ku, kẹ wẹ kelẹni tikpọ Jerusalẹm? Ogẹn ahụn Jerusalẹm lẹ obodo ndị nọhunmẹn'ẹ gi rị e bi udọn-lẹ-ndọnkwa, ogẹn ahụn ịhịan bizi imẹ Nẹgẹvụ rị ẹbamịn ndịdan-mirin ọda-ọda lẹ imẹ Shẹfẹla rị nkpọtu òke ibẹka ọdịdan-ẹnyanwụn.’ ”
8
Osolobuẹ nọ nwan sị Zẹkaraya:
9
Osolobuẹ ihiẹn ile rị okpuru ẹ sị: “Han nị ezigbo eṅẹn; e gi ni ẹfọma lẹ omikẹn e sọn ibe ụnụ;
10
abịangbulẹ ni ikpoho di wẹ nwụn, ndị nwọnlẹni nẹdi, abịamabịa lẹ ndị igbẹnnyẹ; amamalẹ ni ni ibe ụnụ eje-ihiẹn.”
11
Kanị ndị nẹdi ụnụ egọnni ntịn. A gbama wẹ isi-akwanran, kụkin ntịn wẹ amamgbe w'a nụ;
12
a kpọkinkẹnmẹ wẹ obi wẹ amamgbe w'a nụ Iwu lẹ oku ndị hụn Osolobuẹ ihiẹn ile rị okpuru ẹ gi Mmọn-nsọ a zihẹni wẹ ghahanị ndị-amụma mbụ. Ịya haịn Osolobuẹ ihiẹn ile rị okpuru ẹ gi gi okẹn iwe-lẹ-ọnụma tikpọ wẹ.
13
Ebe o mẹni azanị wẹ m kẹ m kpọ wẹ oku, a kpọ wẹ m, m nọ jụ n'a zakọ m wẹ. Ya kẹ mmẹ wụ Osolobuẹ ihiẹn ile rị okpuru ẹ ku.
14
E gi m ndị-iṅẹnrẹn feyịya wẹ kẹ okẹn ufere dọn e feyịya ihiẹn, fe wẹ ye alị ndị ọzọ wẹ marịnlẹni. Ẹrịra kẹ alị wẹ dọn gba okpokoro, onwọnzini onyẹ a gha a e jẹn, onwọnzini onyẹ a gha a a la; alị ọma nwẹn nọ gba okpokoro.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes