Reng-oreng jareya esoro keya atanya ka mam-imam ban bi-nabbi kantha reya, “Ponapa gi' parlo kaula sadaja nangese ancorra Padalemman Socce kalaban cara apowasa sabban bulan se kapeng lema' akadi se ampon kalakon ataonan abidda?”
Dhabuna, “Kabala ka reng-oreng sanagara reya ban ka para imam, ja' powasa ban tanges se elakone reng-oreng jareya e bulan se kapeng lema' ban kapeng petto' sampe' pettong polo taon abidda rowa banne pangormadan ka Sengko'.
Jareya se edhabuwagi PANGERAN kalaban parantara'anna bi-nabbi e jaman lamba' e bakto Yerusalim gi' ekennengnge oreng ban ma'mor pandhudhu'na; e bakto oreng banne pera' enneng e sa-disa e sabingkerra kottha tape la'-mala' enneng e bagiyan lao'na ban e babana mo'-gumo' e bagiyan bara'.
Ja' nyecce' para randha, na'-kana' jatim, reng-oreng manca se neptep e nga'-tengnga'anna ba'na, otabana sapa'a bai se teppa'na kasossa'an. Ban ja' andhi' sajja se jahat ka sasamana.’
Sengko' padha ban kaleng busbus, nyapowe reng-oreng jareya kabbi sampe' padha tapaksa odhi' e ra-nagara manca. Tana se landhu reya la daddi seppe tadha' orengnga sarta kajal.”