“Osolobuẹ ihiẹn ile rị okpuru ẹ sị: e kinhẹngụọ m Zayọnụ; ẹghẹẹ, m sikọ d'e biri imẹ Jerusalẹm, a kpọma wẹ Jerusalẹm ‘Obodo ezioku’, kpọma ugu Osolobuẹ ihiẹn ile rị okpuru ẹ, ‘Ugu rị nsọ.’
Ezioku-ezioku, nị wẹ d'e gbemẹzi iyetọ hụ, onwọnni onyẹ a hụn ihiẹn ọ rị a rụn, kẹ ịhịan kẹ anụmanụ; kẹ ndị pụkọnị kẹ ndị banlanị onwọnni onyẹ obi e ru alị yeni egun ndị-iṅẹnrẹn — makẹni e mẹgụọ m onyẹ-onyẹ bunụmanị ibe ẹ.
Kẹ ụnụ ndị Juda lẹ Izrẹlụ ile te dọn wụ ihiẹn wẹ bụ ọnụ ẹnya alị ndị-ọzọ, ẹrịra kẹ m sikọ nwan d'a zụọpụha ụnụ, ụnụ a wụrụ ngọzi. Atụlẹ ni nwan egun; ka jikẹnmẹ ni a rụn Ụlọ ahụn.
“Osolobuẹ ihiẹn ile rị okpuru ẹ sị: Ọnụ ndị ahụn ụnụ e busọnmẹ ifọn nke ẹnọ lẹ ifọn nke isẹn lẹ ifọn nke ẹsa lẹ ifọn nke iri e bigụọ. Ogẹn hụ ile ụnụ te gi e bu ọnụ ndịnị jẹnkọ nwan d'a wụrụ nị ụnụ ndị Juda ogẹn ịghọghọ lẹ anwịnrịn lẹ mmẹmmẹ. A nị nị nwan ezioku lẹ udọn a sụọ ụnụ ụsụọ.”
Ẹghẹẹ, ndị bi obodo ohu k'a chọjẹn ndị bi obodo ichẹn d'a sị wẹ, ‘Bịa nị, nị ẹnyi d'a rịọ Osolobuẹ; bịa nị nị ẹnyi d'e fe Osolobuẹ ihiẹn ile rị okpuru ẹ; ẹnyi lẹ enwẹn ẹnyi e jẹnmẹkwọ-o!’