Mwaei Jehovah ne bo lugosiek ko u ni kole: Ama ng’etkong’ agobo Sion, ng’etkonda ne o, ak ama ng’etkong’ agobo inendet eng’ neregek che ng’wonen mising’.
Mwaei Jehovah ko u ni kole: Kaaweekyige Sion, ak ameny kwenutab Jerusalem: ak keguure Jerusalem, Nganaset ne bo iman; ak keguure tulwetab Jehovah ne bo lugosiek, Tulwet ne tilil.
Mwaei Jehovah ne bo lugosiek ko u ni kole: Ngot ko bo kwong’et eng’ konyekab bik che ng’etu eng’ bichu eng’ betusiechoto, ko tos ma bo kwong’et agine eng’ konyekyuk? Mwaei Jehovah ne bo lugosiek.
Mwaei Jehovah ne bo lugosiek ko u ni kole: Ingogimegitu eunekwok, okwek che ogase ng’alechu eng’ betusiechu eng’ maotik, che kimi eng’ betut ne kigiluumei lumeiywotab gotab Jehovah ne bo lugosiek, noto ko hekalut, si keteech.
Amu kingotom koit betusiechoto ko kima konyoru chi melekto, ak kima keyaaktoi kiy agobo tiony; ak kima komi kalyet eng’ inendet ne mandoi ak eng’ inendet ne nyonei amu bunyot: amu kiagochi chi age tugul koborio ak chitab kokwennyi.
Amu tun biitu keswotab kalyet: tun yiei ketitab sabibuk, ak korurio tuguk eng’ emet, ak kogon kipsengwetisiek rewot; ak agochi bik che king’et eng’ bichu konam tuguchu tugul koek borotenywa.
Amu mwaei Jehovah ne bo lugosiek ko u ni kole: Ko u ye kigabwat ayaiywok yaitiet, ye kitacha kwanisiekwok kot anerech, mwaei Jehovah ne bo lugosiek, ak kima awal kabwatutikyuk;
amat kobwat chi age tugul eng’ okwek yaitiet eng’ muguleldanyi agobo chitab kokwennyi: amocham kayosiet age tugul ne bo lembech: amu aweche tuguchuto tugul, mwaei Jehovah.
Mwaei Jehovah ne bo lugosiek ko u ni kole: Egu eng’ gotab Juda boiboiyet ak kagasetab ge, ak igorwekab boiboiyet, karugutetab ge ne bo arawetab ang’wan, ak ne bo arawetab mut, ak ne bo arawetab tisab, ak ne bo arawetab taman; ocham anyun imanit ak kalyet.
Mwaei Jehovah ne bo lugosiek ko u ni kole: Tun namei bik tamanu eng’ betusiechoto, che bunu kutuswek tugul che bo bororiosiek, ngorietab Yahudiot, kolenji, Kibendi tugul koboten, amu kigegas kele mi Kamuktaindet kobotok.