|
| 1 |
|
| Ē-bīn sī Siōng Chú iú-koan Hap-tek-la tōe-khu kap Tāi-má-sū-kek ê sìn-sit: Sè-kan-lâng, te̍k-pia̍t sī Í-sek-lia̍t ta̍k-ê chi-cho̍k, in ê ba̍k-chiu lóng chù-ba̍k teh khòaⁿ Siōng Chú; |
|
| 2 |
|
| hù-kūn ê Hap-má, sīm-chì chin khiáu ê Thài-ní kap Se-tùn mā án-ni. |
|
| 3 |
|
| Thài-ní ūi-tio̍h ka-kī khí-chō pó-lúi, tún-chek gûn chhin-chhiūⁿ tún-chek thô͘-soa, chek-chū kim chōe kah chhin-chhiūⁿ koe-lō͘ ê thô͘-bê. |
|
| 4 |
|
| M̄-kú, Chú it-tēng ōe chiong i só͘-ū--ê pak-liáu-liáu, mā ōe phah-pāi i hái-siōng ê sè-le̍k, sio-húi i ê siâⁿ. |
|
| 5 |
|
| A-si̍t-ki-lûn khòaⁿ--tio̍h chiū kiaⁿ-hiâⁿ; Ka-sat kiaⁿ kah phi̍h-phi̍h-chhoah; Í-kek-lûn ê ǹg-bāng ōe lo̍k-khong. Ka-sat bōe koh-chài ū kun-ông; A-si̍t-ki-lûn bōe koh-chài ū lâng khiā-khí. |
|
| 6 |
|
| Hūn-cha̍p ê chióng-cho̍k ōe lâi A-si̍t-tu̍t tēng-ku. Góa beh tû-bia̍t Hui-lī-sū -lâng ê kiau-ngō͘. |
|
| 7 |
|
| Góa beh hō͘ in bô koh chia̍h kâⁿ-huih ê bah, chhùi-lāi bô koh ū bōe-ēng-tit chia̍h ê chia̍h-mi̍h. Hui-lī-sū só͘ chhun ê lâng ōe kui-sūn lán ê Siōng-tè, chhin-chhiūⁿ Iû-tāi ê chi̍t ê chong-cho̍k; Í-kek-lûn -lâng ōe chhin-chhiūⁿ Iâ-pò͘-su -lâng. |
|
| 8 |
|
| Góa beh chat-iâⁿ pó-hō͘ góa ê ka-hn̂g, bô hō͘ tùi-te̍k chhim-hoān; chhim-lio̍k-chiá bōe koh lâi kong-kek, in-ūi góa hiān-chāi chhin-sin teh kò͘-siú. |
|
| 9 |
|
| Sek-an ê chú-bîn ah, tio̍h hoaⁿ-hí khoài-lo̍k! Iâ-lō͘-sat-léng ê chú-bîn ah, tio̍h hoan-ho͘! Lí khòaⁿ, lí ê kun-ông lâi lah! I sèng-lī khái-soân; i khiam-sùn khiâ-lû, chiū-sī khiâ lû-á-kiáⁿ. |
|
| 10 |
|
| Góa beh tû-khì Í-sek-lia̍t ê chiàn-chhia, tû-bia̍t Iâ-lō͘-sat-léng ê chiàn-bé, at-chi̍h kau-chiàn ê keng. I beh tùi lia̍t-kok soan-pò͘ hô-pêng. I ê thóng-tī ōe tùi chit-ê hái kàu hit-ê hái, tùi Iù-hoat-la-tí-hô ti̍t-kàu tōe-ke̍k. |
|
| 11 |
|
| Sek-an ah, in-ūi góa ū ēng huih kap lí li̍p-iok, góa beh kā lín chiah-ê siū-lia̍h ê lâng tùi bô-chúi ê chhim-khiⁿ kái-kiù--chhut-lâi. |
|
| 12 |
|
| Lín chiah-ê siū-lia̍h iáu ū ǹg-bāng ê lâng ah, tio̍h tò-tńg--lâi, tńg-lâi lín ê pó-lúi. Góa kin-á-ji̍t soan-pò͘: Góa beh ka-pē pó͘-sióng lín. |
|
| 13 |
|
| Góa beh ēng Iû-tāi chòe góa ê keng, ēng Í-sek-lia̍t chòe an tī keng ê chìⁿ. Sek-an ah, góa beh kek-tōng lí ê chú-bîn, hō͘ in chòe góa ê to-kiàm kong-kek Hi-la̍h -lâng. |
|
| 14 |
|
| Siōng Chú beh chhut-hiān tī I chú-bîn ê téng-bīn; I ê chìⁿ beh chhin-chhiūⁿ sih-nà siā-chhut; Chì-koân ê Siōng Chú beh pûn sàu-kak, chē kńg-lê-á-hong tùi lâm-pêng lâi chìn-kong. |
|
| 15 |
|
| Siōng Chú — Bān-kun ê Thóng-sòe beh pó-hō͘ I ê chú-bîn; in ōe thun-bia̍t hìⁿ chio̍h-thâu ê tùi-te̍k, ōe hoan-ho͘ chhin-chhiūⁿ chiú-chùi ê lâng tōa-siaⁿ hoah; in ōe hō͘ tùi-te̍k ê huih lâu kah chhin-chhiūⁿ hiàn-chè ê huih, tùi chè-tôaⁿ ê sì-kak-thâu ek--chhut-lâi. |
|
| 16 |
|
| Hit-ji̍t, Siōng Chú — in ê Siōng-tè beh kiù in, chhin-chhiūⁿ bo̍k-chiá kái-kiù iûⁿ-kûn; in ōe chhin-chhiūⁿ ông-koan ê pó-chio̍h tī I ê tōe hoat-kng. |
|
| 17 |
|
| Hiah-ni̍h hó! Hiah-ni̍h súi! Siōng Chú sù ngó͘-kok hō͘ siàu-lâm ióng-chòng, sù sin-chiú hō͘ siàu-lú bí-lē. |
|
|
|
|