To on nanaay, to on mbaɗaay anniya teddingo innde am, nden kam mi ukkan naaloore dow mooɗon, mi laatinan barkaaji mon naaloore. Ooho, mi naali ɗi, ngam on ngalaa anniya hakkilango koo ɗume.” Non Jawmiraawo honooɓe asama wi'i.
Naa en fuu en ngoodi Baabiraawo gooto na? Naa Allah gooto tagi en fuu na? Koni en zammbotirta? Koni en njawi alkawal ngal Allah haɓɓuno bee kaakiraaɓe meeɗen?
Woodi boo huunde ɗiɗawre nde on mbaɗata: On ɗon cudda hirsirde Jawmiraawo bee gonɗi e bojji e uumaali, ngam o faalataa dokke mon, o jaɓataa ɗe diga juuɗe mon.
Ammaa on ɗon ƴama: “Ngam ɗume?” Ngam Jawmiraawo laati ceedoowo hakkunde maaɗa e debbo sukaaku ma. Debbo oo woni kawtiɗɗiraawo ma mo kaɓɓuɗa alkawal bee muuɗum, ammaa a zammbi mo.
Jawmiraawo Allah mo Isra'iila wi'i: “Mi ɗon wanya ceergal bana mi wanyirta goɗɗo mo soɓni limce mum bee toonyaare. Ngam maajum kakkilane ko'e mooɗon. Taa on mbaɗa zammba.” Non Jawmiraawo honooɓe asama wi'i.