ụnụ jụ nị ụnụ egọnkọ m ntịn, nị ụnụ egikọ oku iye ẹfan m ọghọ dọn, m k'a bụ ụnụ ọnụ; m k'e gi ịbụ-ọnụ nọkin ngọzi ụnụ — e mẹgụọdẹ m'a, makẹni ụnụ egini oku iye ẹfan m ọghọ dọn. Ya kẹ Osolobuẹ ihiẹn ile rị okpuru ẹ ku.
“Kanị ụnụ nwẹn a ghagụọ ụzọ pụ; ụnụ e gigụọ eje-ihiẹn ụnụ rị a kuzi mẹ ndị bu ọda kpọgburu; ụnụ e tikpọgụọ iwu hụn m ye ndị Livaị. Ya kẹ Osolobuẹ ihiẹn ile rị okpuru ẹ ku.
Mmẹ nwẹn e mẹgụọ nwan ụnụ wụrụ ndị wẹ e legberi, e welụagụọ m ụnụ alị ẹnya alị ile, ebe o mẹni ụnụ ara gha ụzọ m, ụnụ e lee ịhịan ẹnya ihun a kuzi iwu m.”
Ndị Juda rị e gi ntụ e fe Osolobuẹ; ịhịan rị e mẹ arụ imẹ Izrẹlụ ile lẹ imẹ Jerusalẹm! Ndị alị Juda hụ e mẹrụ Ụlọ-nsọ Osolobuẹ hụn a sụọ Osolobuẹ ụsụọ, a lụ ikpoho alị ọzọ e fe mmọn wụlẹni Osolobuẹ!
Eje-ihiẹn ọzọ ụnụ e mẹ wụ nị ụnụ a kwan ẹnya-mirin e kpu ukpo nchụn-ẹjan Osolobuẹ, a kwan ụya, nị a ra narịnzị oyiye ụnụ, nị ihiẹn ụnụ wẹhẹ arịzị a sụọ a.
Ụnụ hụ a jụ, “Kị haịn Osolobuẹ gilẹni a narịn oyiye ẹnyi?” Osolobuẹ rị a shịagbu i ẹri haịn, ọ rị a hannị ịyụ lẹ nwunyẹ-ụtụntụn ị eṅẹn ebe ị nọ la a tọ, ọsụọn'a nị ịyụ lẹ ịya rị kete-kete, ọsụọn'a n'i kwe nkwa lụrụ a.
Osolobuẹ wụ Chuku Izrẹlụ sị mkpechan e ze ẹ ize, nị onyẹ mẹn'ẹ rị e gi eje-ihiẹn e kpumẹ ẹwuru ẹ. Ya kẹ Osolobuẹ wụ Chuku Izrẹlụ ku. Kpachanpụ nị nwan ẹnya ihiẹn ụnụ rị e ro — alatọkwọlẹ ni nkwa hụ ụnụ gi lụ.
Ụnụ e kusọnmẹ ihiẹn ndụn ụnụ gi a gụ Osolobuẹ. Kanị ụnụ sị, “Nanị kẹ ẹnyi dọn ku ndụn-ọgụgụ ye ẹ obi?” Ụnụ a sị, “Ndị ile e mẹ eje-ihiẹn wụ ezigbo ịhịan ẹnya Osolobuẹ; ihiẹn wẹ a sụọd'a a sụọ,” mọbụ “Elebe kẹ Osolobuẹ hụn a han ezigbo eṅẹn rị?”