Ayiwa, Masaba, Setigi ko: «N bena n ka ciden ci, a ka sira labɛn n ɲa. Aw be Matigi min yɔrɔ ɲinina, ale bena bari ka don a batoso kɔnɔ. Ciden min bena jɛnɲɔgɔnya koo fɔ, aw be min fɛ, o natɔ filɛ!»
A bena sigi ka nɔgɔ bɔ i n'a fɔ warigwɛbaarabaga. A bena sarakalasebaga Levi kɔmɔgɔw saniya i n'a fɔ warigwɛbaarabaga ni sanufagala b'a kɛ cogo min na k'u nɔgɔ bɔ. Olu le bena sarakaw di Masaba ma cogo bɛnnin na.
Masaba, Setigi ko: «Ne bena gwɛrɛ aw la kiti kama. Ne bena teliya ka lagwɛlikɛla le jalaki, ni ɲamɔgɔyakɛlaw ni minw be kali ka sɔrɔ tiɲɛ tɛ, ni minw be baaradenw namara, ani minw be firiyamusow, ni falatɔw, ni lonanw tɔɲɔ n'u te siran ne ɲa, ne bena olu bɛɛ jalaki.»
K'a ta aw faaw ka tile ma, aw kɔni ma sɔn ka nɔrɔ ne ka fɔta la k'a bato. Aw ye kɔsegi ne ma, ne bena sɔn aw ma. Aw b'a fɔ ko: ‹An bena kɔsegi i ma cogo di?›
Aw ye na ni jakaw bɛɛ dafaninw ye n batoso nafolo marayɔrɔ la, waasa dumuni ka sɔrɔ n ka soo kɔnɔ. Aw ka ne kɔrɔbɔ ten k'a filɛ. Ne Masaba, Setigi le ko ten. Ni ne tena sankolo dayɛlɛ, n ka hɛrɛ ka jigi aw kan kosɔbɛ.
O tuma na, mɔgɔ minw tun be siran Masaba ɲa, olu le tun be kumana ɲɔgɔn fɛ. Nga Masaba y'a tulo malɔ u ka kuma na, k'a janto a la. Kitabu dɔ sɛbɛnna Masaba ɲana k'a ɲasiranbagaw koo fɔ, minw b'a tɔgɔ boɲa.
Masaba, Setigi ko: «Ne be loon min labɛnna, u bena kɛ ne niyɔrɔ ye o loon na. Deen min be baara kɛ a faa ye, a faa be makari a la cogo min na, ne bena makari u la ten.
O la, faranfasi min be mɔgɔtilennin ani mɔgɔjugu cɛ, aw bena o lɔn. Min be baara kɛ ne Ala ye, ani min te baara kɛ ne ye, faranfasi min b'u cɛ, aw bena o lɔn.
Loon nin setɔ filɛ, a gwannin be i n'a fɔ dibi. A bena yɛrɛboɲalaw ni mɔgɔjuguw bɛɛ jɛni i n'a fɔ biin. Ne Masaba, Setigi ko ten. U lili tena to, sankofɛrɛ u furaburu!