N'u ye buru nin fiyɛ belebele a siɲɛ filanan na fana, minw be worodugu ɲafan fɛ, olu ka wili ka taga. Buru kaan bena kɛ taamasiɲɛ ye k'a fɔ u ye ko u wilituma sera.
K'aw to aw ka jamana na, n'aw jugu dɔw k'u ben'aw kɛlɛ, ni aw wilila ko aw be taga u kɛlɛ tuma min na, aw ka buruw fiyɛ belebele. O la, ne Masaba aw ka Ala bena n hakili to aw la k'aw kisi aw juguw ma.
Aw ka ɲanagwɛlonw na fana, aw ka kalokura ɲanagwɛw la, n'aw ka ɲanagwɛ tɔw loonw na, n'aw b'aw ka saraka jɛnitaw n'aw ka jɛnɲɔgɔnya sarakaw bɔ tuma min na, aw ka buruw fiyɛ. U bena aw ka Ala hakili jigi aw ka koo la. Ne le ye Masaba ye, aw ka Ala.»
O kɔ, Urubɛn kɔmɔgɔw ka sigiyɔrɔ mɔgɔw wilila n'u la kɛlɛdenw, n'u ka taamasiɲɛ ye. Sedewuri dencɛ Elisuri tun ye Urubɛn kɔmɔgɔw la kɛlɛdenw ɲamɔgɔ ye.
O kɔ tugu, Efarayimu kɔmɔgɔw ka sigiyɔrɔ mɔgɔw wilila n'u la kɛlɛdenw, n'u ka taamasiɲɛ ye. Amiwudi dencɛ Elisama le tun ye Efarayimu kɔmɔgɔw la kɛlɛdenw ɲamɔgɔ ye.
A laban na, Dan kɔmɔgɔw ka sigiyɔrɔ mɔgɔw wilila n'u la kɛlɛdenw n'u ka taamasiɲɛ ye, ka tugu tɔ nunu bɛɛ kɔ. Amisadayi dencɛ Ayezɛri tun ye Dan kɔmɔgɔw la kɛlɛdenw ɲamɔgɔ ye.
Musa y'a fɔ a birancɛ, madiyankan Erewuyɛli dencɛ Obabu ye ko: «Masaba y'a fɔ ko a bena yɔrɔ min d'an ma, an taatɔ filɛ o yɔrɔ la sisan. Na an be taga ɲɔgɔn fɛ, Masaba ye layidu ta ko a bena koɲuman min kɛ Isirayɛlidenw ye, i bena dɔ sɔrɔ o la an fɛ.»