Ak ye oguut ne po waagaatap aeng', kotoi panda anyun nganasook che menyei komostap murot tai. Kuutetap waagaat ne uu nooto ko kaboorunet ye tau pandanywa.
“Ye obe lugeet eng' emeng'wong' obaregei ak puunyoot ne usook, oguut anyun igondisyechooto po waagaat, si kibwaatak anyun eng' taitap Kamuktaindet ne Toroor Kamuktaindeng'wong' ak kesorwok eng' puunikwok.
Eng' peetuut ne po kaagaaseng'wong' po kei ak eng' igoorwekwok che ki king'at, ye leeldos arawekwok oguut anyun igondisyek eng' paragutap kagoochinoikwok che kibeelei ak eng' paragutap tiseiywek che po kagoochinoikwok che po kaalyeet. Egu chooto kabwaatet eng' okweek eng' taitap Kamuktaindeng'wong'. Aa Kamuktaindet ne Toroor Kamuktaindeng'wong'.”
Ne kiletu eng' nganasook tugul, ne ki toi panda ko nganaseetap lagogap Dan kosubi songolyennywa kosupkei ak pcheutigap lugosyekwak, ak ki pou Aieser weeriitap Amisadai.
Ki leenji `Musa Hobap weeriitap Reuel Midianindet, kapyugoinnyi, “Kibendi ole ki iarorwech Kamuktaindet ne Toroor kole, ‘Agoonok.’ Ongebe tugul ak kiyaun ne myee, amu ki komwa ne myee Kamuktaindet ne Toroor agobo Israel.”
Ara ki toi icheek panda ne po peetuusyek somok kong'etye tulweetap Kamuktaindet ne Toroor. Ki indoe icheek moingetap arorutyetap Kamuktaindet ne Toroor eng' pandap peetuusyek somok, kocheeng'jinoti ole imuung'ee.