Ak ki u ichek bik che ing’unyng’ung’dos, komwaei che yaach eng’ itikab Jehovah; ak kingogas Jehovah, kolalyo neregekyik; ak kilal matab Jehovah eng’ kwenunywa, ak kibeel ole bo tabanwekab nganaset.
Ak kisich maget ne ya tuiyet ne o ne bo bik alak tugul che terotin che kimi kwenunywa; ak kiririo lagokab Israel agichek kogeny, kolen, Ng’o ne konech banyek keam?
Ak kigas Musa korirtos bik che bo gorikwak tugul, chi age tugul eng’ kurgetab emainnyi: ak kilalyo neregekab Jehovah mising’; ak kiyait noto eng’ Musa agine.
Tos ane ne kiasiche bichu tugul? Tos ane ne kiasich kot ilenja, Kesene tegeng’ung’, ko u ye keseni kwan lakwet ne reriei, ile amut koba emet ne kiiyosiechi kwanisiekwak?
Ak kilenji Jehovah Musa, Iyumwa boisiek tamanwogik tisab che bo Israel, che ingen ile icheget ko boisiekab bik, ak bounikwak, imutu kobwa emait ne kituiyechin, si kobiit kotononso koboten eng’ oloto.
Ak achoruge anyo keng’alal ak inye eng’ oloto: ak anemunenen kebebertab tamirmiriet ne miten, ak ande bichoto; ak kogesen ichek lautietab bik koboten, si maigeseni inyege.
Ak kichorgei Jehovah eng’ boldet, ak kong’alalji Musa, ak kinam kebebertab tamirmiriet ne kimi inendet, konde boisiechoto tamanwogik tisab; ak ye kingotebe ichek tamirmiriet, koamda anyun ng’alek che bwanei, ago mata tun koyai ko u noto kogeny.
Ago king’etune bik aeng’u nganaset, kigiguure age Eldad, ak kiguure age Medad: ak kitebe ichek tamirmiriet; ak ki boto bichoto, icheget che kiga kisir, ago kima ba ole mi Emait; ak kiamda ng’alek che bwanei eng’ nganaset.
Ak kius usonet ne bunu Jehovah, ak kiib taok eng’ nyanjet, ak kiunda taochoto kobutyi nganaset, ole yamei bandab betut agenge ngeng’eete nganaset eng’ komosi ak komosin keyiem nganaset, ak kitirirendos ne yamei kakwautik aeng’ che bo eut kong’eete ng’ony.
Ak king’eetyo bik betunoto komugul, ak kemounoto komugul, ak eng’ betut ne bo aeng’ komugul, koba koyum taochoto: inendet ne kiiyum che ng’ering’ ko ki yamei homerisiek taman; ak kima taochoto koyieme nganaset.