|
| 1 |
|
| Miriyamu na Arooni bakagamba kubi ahari Musa, ahabw'omukazi Omukuushi ou yaabaire ashweire. Manya akaba ashweire Omukuushikazi. |
|
| 2 |
|
| Baagira, bati: Beitu Ruhanga agambira omuri Musa wenka? Itwe shi tatugambiramu? Haza ekyo Nyakubaho yaakihurira. |
|
| 3 |
|
| Mbwenu omushaija ogwo Musa akaba ari omucureezi okukira abantu boona abari omu nsi. |
|
| 4 |
|
| Ahonaaho Nyakubaho yaagira Musa na Arooni na Miriyamu ati: Imwe mwenshatu nimwije aha ihema ry'okubugabuganiramu; nabo bonshatu bazayo. |
|
| 5 |
|
| Nyakubaho ashuumira omu nyomyo y'ekicu, ayemerera aha muryango gw'eryo ihema, haza ayeta Arooni na Miriyamu; nabo bombi baija. |
|
| 6 |
|
| Mpaho abagira ati: Nimuhurire ebi naaza kugamba. Omuriimwe ku haba harimu omurangi, Nyowe Nyakubaho mwemmanyisiza omu kworekwa, kandi ngambira nawe omu kirooto. |
|
| 7 |
|
| Kwonka tikwo ntwaza ntyo Musa omuheereza wangye. We n'omwesigwa omu ka yangye yoona. |
|
| 8 |
|
| We ngamba nawe butunu nitureebana, kutari mu nfumu, kandi areeba oku Nyowe Nyakubaho ndikushusha. Mbwenu ahabw'enki mutatiinire kugamba kubi aha muheereza wangye ogwo? |
|
| 9 |
|
| Nyakubaho atyo abagirira ekiniga kingi munonga, haza agyenda. |
|
| 10 |
|
| Reero ekicu ku kyarugire aharuguru y'eihema, ahonaaho Miriyamu yaakwatwa ebibembe, yaayera nk'orubaare. Na Arooni ku anaga ati amaisho ahari Miriyamu, ashanga yaabembire. |
|
| 11 |
|
| Arooni nikwo kugira Musa ati: Ai bambe mukama wangye, otatufubira ahabw'eki twakoresa obushema, tukacumura. |
|
| 12 |
|
| K'arekye kuba nk'ekifu ekiruga omunda ya nyinakyo kijunzire orubaju rumwe. |
|
| 13 |
|
| Mpaho Musa atakira Nyakubaho ati: Ai Ruhanga, naakweshengyereza, mukize. |
|
| 14 |
|
| Kwonka Nyakubaho agira Musa ati: Ishe kuri yaamucwera amacwante aha maisho, takwitsirwe enshoni okumara ebiro mushanju? Mbwenu omurekye, bamute omu ngoonyo aheeru y'orusiisira okumara ebiro mushanju, reero bwanyima barumugaruremu. |
|
| 15 |
|
| Miriyamu atyo bamuta omu ngoonyo aheeru y'orusiisira okumara ebiro mushanju, kandi abantu barereera kwimutsya orugyendo, okuhitsya obu baagarwire Miriyamu omu rusiisira. |
|
| 16 |
|
| Ebyo ku byahwaire, abantu baimutsya orugyendo baaruga Hazerooti, baateera enkambi omu ihamba rya Parani. |
|
|
|
|