1
Ñanderuete oñe’ẽ Moiséspe ha he’i:
2
Emondo kuimba’ekuéra omaña porã hag̃ua Canaan yvy rehe, Che ame’ẽtava Israel ñemoñarenguérape. Opaite 12 Israel tríbugui remondóta peteĩ kuimba’e, oikóva ijapytépe mburuvicha ramo.
3
Ha Moises omondo Paran desiérto guive, Ñanderuete he’i haguéicha; ha opaite ko’ã kuimba’e oikóma mburuvicha ramo Israel ñemoñarenguéra apytépe.
4
Ko’ãva hína héra: Ruben tríbugui oñemondo Samúa, Zacur ra’y;
5
Simeon tríbugui oho Safat, Hori ra’y;
6
Juda tríbugui oho Caleb, Jefune ra’y;
7
Isacar tríbugui oho Igal, Jose ra’y;
8
Efrain tríbugui oho Oséas, (Josué) Nun ra’y, (11,28).
9
Benjamin tríbugui oho Palti, Rafu ra’y;
10
Zabulon tríbugui oho Gadiel, Sodi ra’y;
11
Jose tríbugui, péva Manases tríbugui oho Gadi, Susi ra’y;
12
Dan tríbugui oho Amiel, Gemali ra’y;
13
Aser tríbugui oho Setur, Miguel ra’y;
14
Neftali tríbugui oho Nahbi, Vapsi ra’y;
15
Gad tríbugui oho Geuel, Maqui ra’y.
16
Ko’ãva hína umi 12 kuimba’e Moises omondova’ekue omaña hag̃ua Canaan yvy rehe; ha Moises ome’ẽ Oseáspe, Nun ra’y, peteĩ téra pyahu: Josue.
17
Moises omondo ichupekuéra omaña porã hag̃ua Canaan rehe ha he’i ichupekuéra: Tapeho ko’águi Négev peve, ha pejupi pe cérrope,
18
ha pema’ẽ mba’eichagua tetãpa oiko upérupi, imbarete térã ikangy, mbovy térãpa heta,
19
ha mba’eichagua yvypépa oiko hikuái, iporã térãpa ivai; ha mba’eichagua távape oikopa hikuái, ndaikorapyjeréi térãpa ikorapy jere yvate hikuái,
20
ha mba’eichagua kokuépa, iporãpa oñeñemitỹ hag̃ua térã nahániri, oĩpa ipype ka’aguy térã nahániri; peñemombaretéke ha pemono’õ hi’akuéra. Heta parralkuéra oñepyrũma hi’a.
21
Upérõ oho hikuái, ha ohecha porãmba Zin desiérto guive Rehob peve, og̃uahẽ Hamat peve.
22
Oike hikuái Négevpe ha ohasa Hebron peve; upépe oiko Ahiman, Sesai ha Talmai, Anac ra’ykuéra. Hebron oñemopu’ãva’ekue 7 áño oñemopu’ã mboyve Zoan, Egípto retãme.
23
Ha og̃uahẽ hikuái Escol yakã meve, ha upégui oikytĩ peteĩ parral rakã hi’a reheve, ha omosãingo peteĩ yvyra rehe mokõi kuimba’e ogueraha hag̃ua ijati’ýre, ha upéicha avei umi granáda ha hígo yvakuéra.
24
Pe yvy oñembohéra Escol cérro, upégui umi 12 kuimba’e oikytĩgui pe parral’a.
25
Ha ojevy hikuái 40 ára haguépe ohecha porãmba rire Canaan yvy.
26
Ha ou hikuái Moises, Aaron ha mayma Israelgua rendápe, Paran desiértope, Cadéspe ha omba’emombe’u ichupekuéra opaite mba’e ohechava’ekue guive, ha ohechauka ichupekuéra umi yva ogueruva’ekue.
27
Ha omba’emombe’u hikuái, ha he’i: Ore rog̃uahẽ pe yvy peẽ oremondo haguépe, ha añetehápe upépe osyry kamby ha eíra; ha ko’ãva hi’akue.
28
Canaan retãyguakuéra katu imbarete, itavakuéra ituichaiterei ha ikorapy jere yvate; rohecha avei upépe Anac ra’ykuérape.
29
Amalecgua oiko Négevpe, Hetgua, Jebusgua ha Amorgua oiko cerrokuéra oĩháme, ha Canaangua oiko yguasu rembe’ýpe ha Jordan rembe’ýpe.
30
Upéramo Caleb omokirirĩ umi tetãyguápe oĩva Moises renondépe, ha he’i: Jaha katu, ñambopoguy hag̃ua ichupekuéra; ñandepu’akáta hesekuéra.
31
Ha umi ambue kuimba’e ohova’ekue hendive, he’i joa: Ndaikatumo’ãi ñambopoguy ichupekuéra, imbareteve ñandehegui.
32
Ha’ekuéra oñe’ẽvai Canaan rehe Israel rekohápe, ha he’i: Pe yvy ore rohasava’ekue rupi romaña hag̃ua, peteĩ yvy omokõva umi ipype oikóvape; ha hetãyguakuéra rohechava’ekue guive kuimba’e ijyvatéva.
33
Rohecha avei upépe kuimba’e ijyvateitereíva (gigánte), Anac ra’ykuéra, gigantekuéra ñemoñare, ore resápe rojogua tukúpe; ha hesapekuéra g̃uarã ore avei rojogua tukúpe.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015