Entayiolo sii tenaa kepir enkop tenaa aimepir, ketii ilkeek anaa aimetii. Entonyok eyautu embata oo lng'anayio le ina kop.” Ore apa ina kata naa erishata oo sabibu le dukuya ooto.
nepuo apa ninche Negeb, neitoki aapuonu Hebron; o Ahiman o Sheshai o Talmai ore apa lelo le ishoi e Anak naa ine etii. (Eteshetaki apa Hebron ilarin oopishana te dukuya Soan te Misiri.)
Neitoki ninche aapuonu oerata le Eshkol, nedung'u ninche teine olng'osila oimarrimarr too lng'anayio loo sabibu, nenap iltung'ana oaare te nchata; eyautua sii ilng'anayio ooji kukumanka o lng'abolo.
Nepuonu ninche enetii Musa o Aron o ina umata pooki oo ltung'ana le Israel ti ong'ata e Paran, te Kadesh; neyaki ninche olomoni o ina umata pooki, neitodol ninche ilng'anayio le ina kop.
Ore Ilmaleki nemanya enkop e Negeb, ore ile Hiti o Iyebusi o le Amori nemanya ina kop oo ndoinyo, netii ile Kanaan embata e naiposha, olkeju le Yordan.”
Neaku eyakita apa ninche iltung'ana le Israel olomoni torrono le ina kop nashomo aaikitalan, ejo, “Ore ina kop nikishomo iyiook aaikitalan naa enkop nanya lelo oomanya, ore lelo tung'ana pooki likitoduaa teina kop naa adoru naa iltung'ana sapuki oleng.